चुनावको संघारमा वाम चुनावी गठबन्धन अस्वाभाविक कदमः कांग्रेस

सहयात्रा टिभी

काठमाडौं । सत्तारुढ दल नेपाली कांग्रेसले चुनावको संघारमा कम्युनस्टि पार्टीहरूबिच चुनावी गठबन्धनको घोषणालाई अस्वभाविक कदम भएको ठहर गरेको छ । नेकपा एमाले, नेकपा माओवादी केन्द्र र नयाँशक्तिबिच मंगलबार भएको चुनावी गठबन्धन र पार्टी एकीकरणको पहलको कदमबाट कांग्रेसले आउँदो चुनावमा बाधा पर्न सक्ने आशंका व्यक्त गरेको छ ।

प्रधानमन्त्री निवास बालुवाटारमा कांग्रेसका शीर्ष तथा प्रभावशाली केन्द्रीय सदस्यहरूको मंगलबार बेलुका बसेको बैठकले कम्युनिस्ट पार्टीहरूबिच भएको एकताको कदमलाई अस्वभाविकरूपमा लिएको नेता विमलेन्द्र निधिले जानकारी दिनुभयो । कम्युनिस्ट पार्टीहरूबिचको एकताले चुनावलाई असर पर्न सक्ने आशंका व्यक्त गर्दै उहाँले भन्नुभयो, “चुनाव यही सरकारले गराउँछ ।”
सत्तामा रहेको माओवादी केन्द्रले लिएको कदमलाई नेता निधिले गम्भीर ऐतिहासिक राजनीतिक भुल भएको बताउनुभयो । यस कदमले माओवादीलाई राजनीतिकरूपमा ठूलो क्षति हुने उहाँको भनाई छ ।

मंगलबार बिहान बालुवाटारमा प्रधानमन्त्री शेरबहादुर देउवालाई भेट्नुभएका माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्री देउवाले ‘सरकारमा सँगै छौँ, चुनावमा तालमेल गर्न पनि तयार छौँ’ भन्नुभएको नेता निधिले जानकारी दिनुभयो ।
यस्तै मंगलबार दिउँसो ३ बजे पनि अध्यक्ष प्रचण्डले फेरि प्रधानमन्त्री देउवालाई भेट्नुभएको थियो । त्यो भेटमा अध्यक्ष दाहालले एमालेसँग चुनावी तालमेल गर्ने, आफ्नौ चुनाव चिन्हमा चुनाव लड्ने, कम्युनिस्ट पार्टी्बिचको एकतालाई पहल गर्ने र निर्वाचनसम्म यही सरकारमा रहने आफ्नो पार्टीको निर्णय सुनाएर बाहिरिनुभएको थियो ।

प्रचण्डको यो निर्णय सुनेपछि प्रधानमन्त्री देउवालगायत शीर्ष नेताहरूले सरकारमा सँगै रहने, तर चुनावमा अरु दलसँग चुनावी तालमेल गर्ने निर्णयलाई अस्वभाविक भएको टिप्पणी गर्नुभएको थियो । बैठकमा प्रधानमन्त्री देउवा, वरिष्ठ नेता रामचन्द्र पौडेल, नेताहरू प्रकाशमान सिंह, पूर्णबहादुर खडका, डा. रामशरण महत, नेता निधि, डा. मिनेन्द्र रिजाल, महेश आचार्य, ज्ञानेन्द्र बहादुर कार्की, डा. प्रकाशरण महतलगायत उपस्थित हुनुहुन्थ्यो ।

पछिल्लो राजनीतिक परिस्थितिका बारेमा प्रधानमन्त्री देउवाले मंगलबार नै संघीय समाजवादी फोरमका अध्यक्ष उपेन्द्र यादव, राष्ट्रिय प्रजातन्त्र पार्टीका अध्यक्ष कमल थापा, नेपाल लोकतान्त्रिक फोरमकाका अध्यक्ष विजयकुमार गच्छदारसँग छलफल गर्नुभएको छ । उहाँले बुधबार बिहान राप्रपा प्रजातान्त्रिकका अध्यक्ष पशुपति शम्शेर राणा, राष्ट्रिय जनता पार्टी नेपालका अध्यक्ष महन्थ ठाकुरलगायतसँग परामर्श गर्नुहुनेछ ।
“मंगलबार भएको वाम चुनावी तालमेलले नेपालको लोकतन्त्र र राष्ट्रवादी शक्तिहरूलाई एकातिर गम्भीर चुनौती थपिएको छ भने अर्को्तिर एक ठाउँमा उभिने अवसर पनि मिलेको छ” नेता निधिले भन्नुभयो । काँग्रेसले परिवर्तित राजनीतिक विषयमा छलफल गर्न बुधबार केन्द्रीय कार्यसम्पादन समितिको बैठक समेत बोलाएको छ । रासस