चुनावको संघारमै रातारात सिडिओको सरुवा !
सहयात्रा टिभी
काठमाण्डौं । सरकारले चुनाव आउन पाँच दिन मात्र बाँकी रहेका बेला रातारात प्रमुख जिल्ला अधिकारी (सिडिओ) हरुको सरुवा गरेको छ ।
सरकारले चुनावको संघारमै कैलाली, नुवाकोटलगायतका जिल्लामा प्रहरी प्रमुख फेरिए लगत्तै केहि जिल्लाका सिडिओहरुको पनि सरुवा गरेको हो ।
गृहमन्त्रालय स्रोतका अनुसार प्रधानमन्त्री शेरवहादुर देउवाको ठाडो आदेशमा सोमबार राति नै पहिलो चरणमा चुनाव हुने जिल्लाका सिडिओ सरुवा गरिएको हो छ । गृह मन्त्रालयको जिम्मेवारी समेत देउवा आफैंले सम्हालेका बेला चुनावलाई प्रभावित पार्ने गरी प्रमुख जिल्ला अधिकारी सरुवा भएको आशंका गरिएको छ । पहिलो चरणमा चुनाव हुने भोजपुर, सोलुखुम्बु, रसुवा र नुवाकोटका प्रमुख जिल्ला अधिकारी सरुवा भएका छन् । सोलुखुम्बुका सिडिओ भुपेन्द्र खत्रीलाई कांग्रेस नेता बलवहादुर केसीको दबाबमा सरुवा गरी उनको ठाउँमा सूर्य खनाललाई पठाइएको छ ।
त्यस्तै, भोजपुरमा चेतराज बरालको ठाउँमा फणिन्द्र दाहाललाई सिडिओ बनाएर पठाइएको छ । स्रोतका अनुसार रसुवाकी प्रमुख जिल्ला अधिकारी हरिदेवी पौडेलको ठाउँमा चोमेन्द्र न्यौपानेलाई पठाइएको छ । कांग्रेस नेताहरुको दबाबमा नुवाकोटमा जगदिशराज बराललाई हटाएर वीरेन्द्रकुमार यादवलाई पठाइएको छ ।