भारतमा गोली लागेका व्यापारी दुई किलोमिटर मोटरसाइकल चलाएर सुरक्षित
सहयात्रा टिभी
सर्लाही । भारतीय भूमिमा गोली लागेका एक नेपाली व्यापारीले गोलीको चोटसहित दुई किलोमिटर मोटरसाइकल चलाएर आफूलाई बचाएका छन् । गोली लागेर सर्लाही मलंगवा–९ घर भएका राकेश चौधरी घाइते भएका हुन् ।
चौधरी कवाड व्यापारी हुन् । भारतको सीतामढीबाट मोटरसाइकल चढेर मलंगवातर्फ आइरहेका बेला गए राति करीब ८ बजेतिर चिलरी मोड भन्ने स्थानमा अज्ञात समूहले उनलाई गोली हानेको थियो । सर्लाहीका प्रमुख जिल्ला अधिकारी कृष्णबहादुर कटुवालले भने–‘नेपालभन्दा करीब दुई किलोमिटर पर भारतीय भूमिमा उनलाई गोली लाग्यो ।
तर पनि उनी मोटरसाइकल चलाएरै नेपाली भूमिमा आए र मलाई गोली लाग्यो अस्पताल लैजाऊ भनेपछि तत्काल अस्पताल पु¥याइयो ।’ उनले थपे–‘अचम्मै भयो । गोली लागेर पनि उनी मोटरसाइकल चलाएरै हिंडे । भाग्य बलियो रहेछ ।’ प्रहरीका अनुसार चौधरीको बायाँतर्फ पेटमा लागेको गोली वारपार भएको छ । सर्लाही अस्पतालमा सामान्य उपचारपछि थप उपचारका लागि उनलाई वीरगञ्ज रिफर गरिएको प्रजिअ कटुवालले बताए । चौधरीलाई गोली हान्ने समूह र गोली हान्ने कारण खुलेको छैन । भारतीय प्रहरीसँग समन्वय गरी घटनाको अनुसन्धान गरिरहेको प्रजिअ कटुवालले जानकारी दिए ।