मलामी बोकेको गाडी दुर्घटना, एकको मृत्यु

सहयात्रा टिभी

गुल्मी । मलामी बोकेको गाडी दुर्घटना हुँदा गए राति एक जनाको मृत्यु भएको छ भने १३ जना घाइते बनेका छन् ।मलामी लिएर सदरमुकाम तम्घास फर्किंदै गरेको लु १ ज १५२१ नम्बरको जीप रेसुङ्गा नगरपालिका–४ स्थित अर्खलेमा दुर्घटना हुँदा एक जनाको ज्यान गएको हो ।

दुर्घटनामा कपिलवस्तुको बाडगंगा नगरपालिका स्थायी ठेगाना भएका ५५ वर्षीय रुद्रबहादुर डेगाको ज्यान गएको जिल्ला ट्राफिक प्रहरी कार्यालय, गुल्मीका प्रहरी हवल्दार देवीप्रसाद पौडेलले जानकारी दिए । दुर्घटनामा १३ जना घाइते भएका छन् । घाइतेमध्ये ६ जनाको अवस्था गम्भीर रहेको प्रहरीले जनाएको छ । दुर्घटनामा परी धुर्कोट गाउँपालिका आत्माराम राना, रेसुङ्गा नगरपालिका–४ का देवराज पाण्डेय, डिलबहादुर दर्लामी, सन्तोष पाण्डेय, ध्रुव मरासिनी, मोहनविक्रम थापा गम्भीर घाइते भएका छन् ।

उनीहरुको पाल्पा असपतालमा उपचार भइरहेको छ । घाइते अन्य ७ जनाको जिल्ला अस्पताल तम्घासमा उपचार भइरहेको प्रहरीले जनाएको छ ।उकालोमा ब्रेक फेल हुँदा दुर्घटना भएको प्रहरीले जनाएको छ । दुर्घटनामा चालक पनि गम्भीर घाइते छन् । मंगलवार डोजरले पल्टाएको ढुङ्गाले लागेर मृत्यु भएका वडा नम्वर ४, अर्खले निवासी ३५ वर्षीय रामबहादुर दर्लामीको शव सदगत गरेर फर्किने क्रममा बुधवार राति दुर्घटना भएको थियो ।