विभिन्न जिल्लामा मतगणना, वाम गठबन्धनको अग्रता

सहयात्रा टिभी

काठमाण्डौ । विभिन्न जिल्लामा मंसिर १० र २१ गते सम्पन्न पहिलो तथा दोस्रो चरणको प्रदेशसभा तथा प्रतिनिधिसभा सदस्य निर्वाचनको मतगणनाको पछिल्लो विवरण प्राप्त भइरहेको छ ।

यहाँ मंसिर १० गते सम्पन्न पहिलो चरणको प्रदेशसभा तथा प्रतिनिधिसभा सदस्य निर्वाचनको बैतडीमा मतगणना जारी रहेको छ । कूल १३ हजार ५०८ मत गणना हुँदा आज बिहान ६ बजेसम्म को मतपरिणामअनुसार एमालेका दामोदर भण्डारीले ६ हजार ९७२ र नेपाली कांग्रेसका नरबहादुर चन्दले पाँच हजार २६९ मत प्राप्त गरेका छन् ।

प्रदेशसभा (क) मा नेकाका हरिमोहन भण्डारी चार हजार ७३८ र नेकपा माओवादी केन्द्रका प्रेमप्रकाश भट्टले ६ हजार १४७ मत प्राप्त गरेका छन् । यस्तै प्रदेशसभा (ख) मा नेकपा एमालेका लीलाधर भट्टले ६ हजार ४५३ र राप्रपाका गणेश चन्दले चार हजार ८५७ मत प्राप्त गरेका छन् । एक लाख ३२ हजार ३१९ मतदाता रहेको बैतडीमा प्रतिनिधिसभा तथा प्रदेशसभाको निर्वाचनमा ७६ हजार ३४३ मतदाताले मतदान गरेका थिए ।

म्याग्दीमा प्रतिनिधिसभामा एमाले–माओवादी केन्द्रका तर्फबाट उम्मेद्वारी दिएका नेकपा एमालेका भूपेन्द्रबहादुर थापाले अग्रता कायम गरेका छन् । बिहान ५ बजेसम्मको मतपरिणामअनुसार थापाले ११ हजार ८९३ मतसहित अग्रता कामय गरेका छन् । उनका निकटतम प्रतिद्वन्द्वी नेकाका खुमबहादुर गर्वुजा, खम्वीरले १० हजार ५६ मतसहित थापालाई पछ्याई रहेका छन् ।

त्यसैगरी प्रदेशसभा (क) मा वाम गठवन्धनका उम्मेद्वार नेकपा माओवादी केन्द्रका विनोद केसीले सात हजार ४० मत प्राप्त गरेका छन् भने लोकतान्त्रिक गठबन्धनका तर्फबाट राप्रपाका भीमप्रसाद गौचनले ६ हजार १९० मत प्राप्त गरेका छन् । प्रदेशसभा क्षेत्र (ख) मा एमालेकी नरदेवी पुनले चार हजार ९५० र नेकाका अमलाल फगामीले चार हजार ५३७ मत प्राप्त गरेका छन् ।

एक नगरपालिका, पाँच गाउँपालिका, ४५ वटा वडा भएको म्याग्दीमा ७५ हजार ५३७ मतदाता रहेकामा ४७ हजार ४४९ मत खसेको थियो । प्रतिनिधिसभामा एक र प्रदेशसभामा दुई निर्वाचन क्षेत्र रहेको म्याग्दीमा १२ जना उम्मेद्वार चुनावी प्रतिष्पर्धामा छन् ।
मंसिर १० गते खोटाङमा सम्पन्न प्रतिनिधिसभा तथा प्रदेशसभा सदस्य निर्वाचनको मतगणना जारी छ । बिहीबार बेलुका साढे सात बजेदेखि शुरु गरिएको मतगणनामा वाम गठबन्धनका उम्मेद्वारको अग्रता कायम छ ।

प्रतिनिधिसभामा वाम गठबन्धनका तर्फबाट साझा उम्मेद्वार बनेका नेकपा एमालेका विशाल भट्टराईको छ हजार २४१ र लोकतान्त्रिक गठबन्धनका तर्फबाट नेकाकी सरस्वती बजिमयको चार हजार ३८१ रहेको छ । भट्टराई र बजियमयको पछिल्लो मतान्तर एक हजार ८६० छ । प्रदेशसभा सदस्य क्षेत्र नं १ (क) मा वाम गठबन्धनका साझा उम्मे्दवार एमालेका राजन राईको दुई हजार ९१८ र नेकाका सुवासकुमार पोखरेलको एक हजार ६९४ मत छ ।

यस्तै, प्रदेशसभा २ (ख) मा वाम गठबन्धनका तर्फबाट माओवादी केन्द्रका उम्मेद्वार रामकुमार राई (पासाङ) को तीन हजार ४९१ र नेकाका विष्णुकुमार राईले एक हजार ९५० मत प्राप्त गरेको मुख्य निर्वाचन अधिकृतको कार्यालयले जनाएको छ । दश राजनीतिक दलका १९ जना उम्मेद्वार रहेको जिल्लामा कूल एक लाख २५ हजार १८३ मतदाता रहेको र ७१ हजार ३११ मत खसेको थियो ।
यसैगरी, यहाँ बिहीबार साँझ ५ः३० बजेदेखि संखुवासभाको निर्वाचन मतगणना शुरु गरिएको छ । मतगणनाको पछिल्लो परिणामअनुसार प्रतिनिधिसभा नेकाका उम्मेद्वार दिपक खड्काको एक हजार १४६, साझा वाम गठबन्धनबाट एमालेका उम्मेद्वार राजेन्द्र गौतमको एक हजार ६९ मत प्राप्त गरेका छन् ।

प्रदेश नंं १ संखुवासभा (क) मा नेकाका टंकप्रसाद राईको ८०७, साझा वाम गठबन्धन माओवादी केन्द्रका पूर्णप्रसाद राई एक हजार ३४४ मत प्राप्त गरेका छन् भने प्रदेश नं १ संखुवासभा (ख) का नेकाका दिपक लिम्बूको ९१७, साझा वाम गठबन्धनका एमालेका तुलसीप्रसाद न्यौपानेले एक हजार ७० मत प्राप्त गरेको बिहान ४ बजेसम्मको पछिल्लो मतगणना सार्वजनिक गरिएको मुख्य निर्वाचन अधिकृत प्रकाश राउतले जानकारी दिए ।

सोलुखुम्बुमा प्रतिनिधिसभा र दुई वटै प्रदेशसभामा वाम गठबन्धनले अग्रता कायमै राखेको छ । मतगणना शुरु भएसँगै अग्रता लिएको वाम गठबन्धनले अहिले मतान्तर फराकिलो बनाउँदै लगेको छ ।
प्रतिनिधिसभातर्फ वाम गठबन्धनका उम्मेद्वार हेमकुमार राईले ६ हजार ४६८ मत प्राप्त गर्दा नेकाका उम्मेद्वार पूर्वमन्त्री बलबहादुर केसीले चार हजार ६४० मत प्राप्त गरेका छन् । यस्तै, प्रदेश (क) मा वाम गठबन्धनका उत्तमकुमार बस्नेतले तीन हजार २४९ मत प्राप्त गर्दा नेकाका प्रकाशसिंह कार्कीले एक हजार ९७९ मत प्राप्त गरेका छन् । प्रदेश सभा (ख) मा वाम गठबन्धनका बुद्धिकुमार राजभण्डारीले तीन हजार ४६५ मत प्राप्त गर्दा नेकाका आङगेलु शेर्पाले दुई हजार ७९० मत प्राप्त गरेका छन् ।

लमजुङमा प्रतिनिधिसभा र प्रदेशसभा दुवैतर्फ वाम गठबन्धनका उम्मेद्वारले अग्रता लिएका छन् । प्रतिनिधिसभामा १४ हजार ८१६ मतगणना हुँदा वाम गठबन्धनका उम्मेद्वार माओवादी केन्द्रका देवप्रसाद गुरुङले अग्रता लिएका छन् । गुरुङले ६ हजार ९४७ मत ल्याउँदा नेकाका उम्मेद्वार दिलबहादुर घर्तीले ६ हजार ९१४ मत ल्याएका छन् ।

यस्तै, प्रदेशसभा (क) र (ख) दुवैतर्फ वाम गठबन्धनका उम्मेद्वारले अग्रता लिएका छन् । प्रदेशसभा (क) मा सात हजार ५१३ मतगणना हुँदा वाम गठबन्धनका उम्मेद्वार धनन्ञ्जय दवाडीले चार हजार ३९३ मतले अग्रता लिएका छन् । दवाडीलाई काँग्रेस उम्मेद्वार गर्जबहादुर गुरुङले दुई हजार ९०६ मतले पछ्याइरहेका छन् । प्रदेशसभा (ख) मा पनि वाम गठबन्धनका उम्मेद्वारले अग्रता लिएका छन् । काँग्रेसका कृष्णप्रसाद कोइरालालाई पछि पार्दै एमालेका पृथ्वीसुब्बा गुरुङले अग्रता लिएका छन् ।

गुरुङले तीन हजार ९०३ मत ल्याउँदा कोइरालाले तीन हजार ५४५ मत ल्याएका छन् । एक प्रतिनिधि र दुई प्रदेशसभा रहेको लमजुङका एक लाख १५ हजार ४४९ मतदाता रहेकामा ७७ हजार ३४० जनाले मतदान गरेका थिए । प्रदेश सभा (क)मा ३६ हजार ६८ र प्रदेशसभा (ख) मा ४१ हजार २७२ मत खसेको थियो ।

मंसिर १० गते सम्पन्न प्रतिनिधिसभा र प्रदेशसभा निर्वाचनको रोल्पामा बिहीबार बेलुकादेखि शुरु भएको मतगणनाको पछिल्लो नतिजाअनुसार वाम गठवन्धनका उम्मेद्वार अगाडि देखिएका छन् ।

बिहान ८ बजेसम्मको मतपरिणाम अनुसार प्रतिनिधिसभाका लागि वाम गठबन्धनका तर्फबाट नेकपा माओवादी केन्द्रका उम्मेद्वार वर्षमान पुनले पाँच हजार ५१ मत प्राप्त गरेका छन् ।

यसैगरी लोकतान्त्रिक गठबन्धनका तर्फवाट नेकाका उम्मेद्वार अमरसिं पुनले दुई हजार ६४९ मत प्राप्त गरेका छन् । प्रतिनिधिसभाका लागि हालसम्म १७ हजार ८०३ मतगणना भएकामा एक हजार २३९ मत बदर भएको बताइएको छ । प्रदेशसभा (क) मा वाम गठबन्धनका तर्फवाट नेकपा माओवादी केन्द्रका कुलप्रसाद केसीले एक हजार ८९४ मत प्राप्त गरेका छन् । यसैगरी, लोकतान्त्रिक गठबन्धनका तर्फबाट नेकाका उम्मेद्वार शेरबहादुर महराले एक हजार ४९७ मत प्राप्त गरेका छन् ।

सो क्षेत्रमा तीन हजार ९४३ मतगणना भइसकेको छ । प्रदेश सभा (ख) मा वाम गठबन्धनका तर्फवाट नेकपा माओवादी केन्द्रका उम्मेद्वार दिपेन्द्र पुनले तीन हजार ७११ मत प्राप्त गरेका छन् । सो क्षेत्रबाट लोकतान्त्रिक गठबन्धनको उम्मेद्वार बनेका नेकाका खगेन्द्रप्रकाश हमालले ८६१ मत प्राप्त गरेका न.छ । सो क्षेत्रमा पाँच हजार २५ मतगणना भइसकेको मुख्य निर्वाचन अधिकृतको कार्यालय रोल्पाले बताएको छ ।