रेशम चौधरीको सांसद बन्ने बाटो रोकियो
सहयात्रा टिभी
काठमाण्डौं । फरार अवस्थामै चुनाव जितेका राष्ट्रिय जनता पार्टीका रेशम चौधरीको सांसद बन्ने बाटो रोकिएको छ । सर्वोच्च प्रशासनले रिट दरपीठ गरेपछि परेको निवेदनमा न्यायाधीश टंकबहादुर मोक्तानको इजलासले रजिष्टारको आदेश कानुनसम्वत भएको फैसला सुनाएको छ ।
साथै आदेशमा कर्तव्य ज्यान मुद्धाको अभियोग लागेका चौधरीले अदालतबाट जारी भएको वारेन्ट तथा म्यादी पूर्जी अवज्ञा गरेको देखिएको समेत फैसलामा उल्लेख छ । सर्वोच्चले आफ्नो फैसलामा फरार अभियुक्तलाई जुन सुकैबेला पक्राउ गरेर अदालतमा दाखिल गर्नुपर्ने प्रवधान समेत स्मरण गराएको छ ।
चौधरी टीकापुर घटनाका मुख्य अभियुक्त हुन् । फरार रहेकै अवस्थामा कैलाली–१ बाट प्रतिनिधिसभा सदस्यको चुनाव जितेका चौधरी निर्वाचित भएको प्रमाण–पत्र वारेसमार्फत पाउनु पर्ने माग गर्दै सर्वोच्च गएका थिए । सर्वोच्चले भनेको छ–‘अदालती प्रक्रियालाई छलेर कसैले पनि संविधान एवम् प्रचलित कानुनले प्रदान गरेको सुविधा उपभोग गर्न पाउनु पर्छ भन्नु कदाचित मिल्दैन ।’
थप भनिएको छ–‘अभियोग लागेका व्यक्तिले कानुन बमोजिम सफाइ लिनुपर्ने हुन्छ । जसका लागि अदालत प्रक्रिया अपनाउनु पर्ने हुन्छ, जुन निवेदकले गरेको पाइएन ।’ अभियोग लागेका व्यक्तिले जानीजानी अदालती प्रक्रियालाई अवज्ञा गरी राज्यद्धारा प्रदान गरिने सुुविधा वा हक उपभोग गर्न गैरबाटोको प्रयोग गर्ने हो भने देशमा दण्डहिनताको स्थिति सिर्जना हुनसक्ने सर्वोच्चले जनाएको छ ।