भारतीय सीमा सुरक्षा बल (एसएसबी) द्धारा एक नेपाली कुटिए
सहयात्रा टिभी
दार्चुला । जेठ–२४, भारतबाट नेपाल फर्कदै गरेका एक नेपाली भारतीय सुरक्षा बल (एसएसबी) द्धारा कुटिएका छन् । बुधबार दार्चुलाको सदरमुकाम खलंगास्थित नेपाल भारत जोड्ने पुलबाट नेपाल फर्कदै गरेका महाकाली नगरपालिका–१, छापरीका नन्दनराम लुहार एसएसबीद्धारा कुटिएका हुन् ।
एसएसबीको कुटाइबाट ५२ वर्षीय लुहारको आँखामा चोट लागेको छ । उनको हाल दार्चुला आँखा अस्पतालमा उपचार भइरहेको नेपाल प्रहरीका डीएसपी नवराज अधिकारीले जनाएका छन् ।
मदिरा सेवन गरेर आएका लुहारले एसएसबीमाथि अभद्र व्यवहार गरेरकाले उनले पिटेको बताइएपनि घटनाको कारण त्यहि नै हो भन्ने निश्चित नभएको जिल्ला प्रहरी कार्यालय दार्चुलाले जनाएको छ ।
मदिरा सेवन गरेर आएका लुहारले अभद्र शैलीमा एसएसबीलाई पुलको गेट खोली दिन भने पछि एसएसबीले उनीमाथि कुटपिट गरेको आफुले जानकारी पाएको प्रहरी सहायक निरीक्षक महेन्द्र थापाले बताए ।
घटना पश्चात भारतीय प्रहरी अधिकारी जिल्ला प्रहरी कार्यालयमा गइ सामान्य छलफल गरेको र फेरी पनि सो विषयमा छलफल हुने प्रहरीले जनाएको छ ।