महिला युरो कपःबराबरीमा रोकिए पोर्चुगल र स्वीट्जरल्याण्ड
सहयात्रा टिभी
काठमाडौँ । असार २६, महिला युरो कप अन्तर्गत गएरातिको खेलमा पोर्चुगल र स्वीट्जरल्याण्डले २.२ गोलको बराबरी खेलेका छन् ।
दुई गोलले पछि परेको अवस्थालाई उल्टाउँदै पोर्चुगल स्वीट्जरल्याण्डबाट अंक खोस्न सफल भयो ।
लेइग स्पोर्ट्स भिलेजमा खेलको तेस्रो मिनेटमा कोउम्बा सोले स्वीट्जरल्याण्डलाई सुरुवाती अग्रता दिलाएकी थिइन् । पाँचौं मिनेटमा राहेल किविचले टोलीको अग्रता दोब्बर बनाइन् ।
५८ औँ मिनेटमा डायना गोम्स र ६५ औँ मिनेटमा जेसिका सिल्भाले गोल गरेपछि पोर्चुगल ले खेल २.२ को बराबरीमा ल्यायो ।
त्यसपछि थप गोल निस्कन नसक्दा दुवै टोली अंक बाँड्न बाध्य बने । यो नजितासँगै समूह सी का पोर्चुगल र स्वीट्जरल्याण्डले समान एक अंक जोडेका छन् । यही समूहको अर्को खेलमा साविक विजेता नेदरल्याण्डले स्विडेनसँग १.१ को बराबरीमा रोकिएको छ ।