माओवादी अध्यक्ष प्रचण्ड आज भारत जाँदै
सहयात्रा टिभी
काठमाडौँ । ३१ असार, नेकपा (माओवादी केन्द्र)का अध्यक्ष पुषपकमल दाहाल प्रचण्ड तीन दिने भ्रमणका लागि आज भारत जाँदै छन् ।
भारतीय जनता पार्टी (भाजपा)को निमन्त्रणामा प्रचण्ड आज दिउँसो १ बजे नयाँ दिल्ली प्रस्थान गर्न लागेका हुन् ।
डेढ महिनाअघि नेपालका लागि तत्कालीन भारतीय राजदूत विनय मोहन क्वात्राले भारतकोतर्फबाट निम्तो दिएको प्रचण्डको सचिवालयले जनाएको छ ।
सचिवालयका अनुसार त्यसक्रममा प्रचण्डले जुलाइको दोस्रो सातासम्म भ्रमण सम्भव हुने बताए पनि भाजपाका अध्यक्ष जगतप्रकाश नड्डाले नै निम्तो दिएपछि औपचारिकरुपमा भ्रमण तय भएको हो ।
प्रचण्डको भारत भ्रमणबारे बिहीबार बसेको माओवादीको स्थायी समिति बैठकमा पनि छलफल भएको थियो ।
प्रचण्ड साउन १ गते आइतबार स्वदेश फर्किने छन् ।
यसबैची, आज हुने उपसभामुखको निर्वाचनमा प्रचण्ड सहभागी नहुने भएका छन । उनी आज हुने उपसभामुखको मतदान अघि नै नयाँ दिल्ली जाने भएका छन्।
संसद सचिवालयका अनुसार आज दिउँसो ३ बजेबाट उपसभामुखको निर्वाचन हुँदैछ।