लमजुङमा दुई महिनामै १० जनामा डेङ्गु संक्रमण

सहयात्रा टिभी

लमजुङ । भदाै २८, लमजुङमा गत वर्षभर देखिएको संख्याभन्दा बढी पछिल्लो २ महिनामै डेङ्गु संक्रमित देखिएका छन् ।

गत वर्ष ८ जना संक्रमित देखिएकामा पछिल्लो २ महिनामै १० जनामा डेङ्गु संक्रमण देखिएको छ । जिल्ला अस्पताल लमजुङमा अहिले २ जना उपचाररत छन् । एक जनामा स्क्रबटाइफससमेत देखिएको चिकित्सकले बताएका छन् ।

स्वास्थ्य कार्यालयका अनुसार साउनमा ६ जना र भदौमा ४ जनामा डेङ्गु संक्रमण देखिएको छ । जिल्ला अस्पतालमा ९ जना र एक जना सुन्दरबजार स्थित नमुना सामुदायिक अस्पतालमा परीक्षण गर्दा डेङ्गु संक्रमण देखिएको स्वास्थ्य कार्यालय प्रमुख अमर दवाडीले बताए ।

डेङ्गुबाट बेंसीशहर नगरपालिकाका ४ जना, राइनास र सुन्दरबजार नगरपालिकाका २-२ जना साथै दोर्दी र मर्स्याङ्दी गाउँपालिकाका १-१ जनामा डेंगु संक्रमण देखिएको छ । यसमा ७ महिना, १ वर्ष र ५ वर्षका देखि ६० वर्षसम्मका छन् । ५ पुरुष र ५ महिलामा यस वर्ष डेङ्गु संक्रमण देखिएको उनले बताए । जिल्ला अस्पताल प्रमुख हेमन्त श्रेष्ठका अनुसार ३ सय ७५ जना बिरामीको परीक्षण गरिएकोमा अस्पतालमा ९ जनामा डेङ्गु देखिएको हो ।