चलचित्र संघले नाइट शो फिल्म हल चलाउन दिन माग गर्दै बोर्डलाई निवेदन

काठमाडौ । असोज ४, राति १ बजेसम्म फिल्म हल चलाउन अनुमति दिनुपर्ने माग गर्दै प्रदर्शकहरुको छाता संस्था नेपाल चलचित्र संघले चलचित्र विकास बोर्डमा निवेदन दिएको छ ।
बोर्ड सदस्य राज कटुवालले चलचित्र संघको मागलाई लिएर बोर्डको आगामी बैठकमा निर्णय हुने बताए । ‘संघको निवेदन प्राप्त भएको छ र हामीले बोर्ड बैठकमा यसबारे छलफल गर्नेछौं,’ उनले अनलाइनखबरसँग भने ।
अहिले ११ बजेसम्म हल चल्न पाउने गरी सिनेमा घरहरुले सात वा साढे सात बजेसम्म मात्र शो राखिरहेका छन् । बोर्डका पूर्वअध्यक्ष दयाराम दाहालकै पालामा ११ बजेसम्म हल चलाउन पाइने र त्यसपछि चलाउनुपर्ने भए प्रशासनको अनुमति लिनुपर्ने निर्णय भएको थियो ।
दाहालको उक्त निर्णयलाई वर्तमान अध्यक्ष भुवन केसीले कार्यान्वयनमा ल्याएका हुन् । तर ‘प्रेमगीत ३’ र दशैंको मुखमै रात्रिकालीन शोमा बन्देज गरिएको भन्दै चलचित्र संघ र फिल्म निर्माताहरु क्रुद्ध बनेका छन् ।