पाँच दलीय गठबन्धनकाे सिट बाँडफाँटको छलफल प्रभावित
सहयात्रा टिभी
काठमाडाैं । असोज १५, सत्तारुढ पाँच दलीय गठबन्धनमा पछिल्ला केहीदिनदेखि निरन्तर चलिरहेको प्रत्यक्षतर्फको सिट बाँडफाँटको छलफल प्रभावित भएको छ ।
गठबन्धन दलहरु समानुपातिकतर्फको बन्दसूची संशोधन गर्न आ–आफ्नो पार्टीको छलफलमा व्यस्त भएपछि प्रत्यक्षतर्फको सिट बाँडफाँट प्रभावित भएको हो ।
गठबन्धनका दलहरुभित्र निर्वाचन आयोगमा बुझाएको बन्द सूचीप्रति तीव्र असन्तुष्टिपछि संशोधनसहित मिलाउन आ–आफ्नो पार्टी छलफलमा जुटेका छन् । यसले प्रत्यक्षतर्फ सीट बाँडफाँट मिलाउने जिम्मा पाएको कार्यदल बैठक समेत प्रभावित भएको छ ।
गठबन्धन दलका शीर्ष नेताहरु समानुपातिक सूची संशोधन गर्न व्यस्त भएपछि १६ गते अघि प्रत्यक्षतर्फको सिट बाँडफाँटबारे निर्णय नहुने निश्चित छ । गठबन्धनका दलहरुबीच प्रतिनिधिसभा र प्रदेशसभाका केही निर्वाचन क्षेत्रमा अझै सहमति जुट्न सकेको छैन् ।
प्रतिनिधिसभाका १६५ मध्ये १६० मा बाँडफाँट टुंगो लागिसकेको नेताहरुले बताएका छन् । जसमध्ये कांग्रेसले ८३, माओवादी केन्द्र ४४, एकीकृत समाजवादी १७, जसपा १५ र जनमोर्चाले २ सिट पाउने सहमति जुटेको बताइएको छ ।