चितवन–२ मा रविका प्रतिष्पर्धी कुन पार्टीबाट को बन्दै छन् ?

सहयात्रा टिभी

काठमाडौं । फागुन २, राष्ट्रिय स्वतन्त्र पार्टी (रास्वपा)का सभापति रवि लामिछानेको नागरिकता अवैध रहेको सर्वोच्च अदालतको ठहरपछि रिक्त भएको चितवन–२ मा वैशाख १० गते उपनिर्वाचन हुँदै छ । आयोगको कार्यतालिका अनुसार चैत २० गते उमेदवारी मनोनयन हुनेछ ।

चुनाव तालिका सार्वजनिक भएसँगै दल तथा नेताहरू उमेदवारबारे छलफलमा जुट्न थालेका छन् । सरकारबाट मन्त्रीहरूलाई फिर्ता बोलाउने निर्णयपछिको पत्रकार सम्मेलनमा नै लामिछानेले आफू नै उपनिर्वाचन लड्ने घोषणा गरिसकेका छन् ।

तथापि रास्वपाले सोमबार उमेदवारबारे निर्णय गर्नका लागि केन्द्रीय समिति तथा संसदीय दलको संयुक्त बैठक बोलाएको भए पनि त्यसबारेमा औपचारिक निर्णय भने गरेन । तर लामिछाने उमेदवार बन्ने विषयमा पार्टीमा कुनै मतभेद छैन ।

रास्वपा सरकारबाट बाहिरए पनि उसले सरकारलाई दिएको समर्थन भने कायम राखेको छ । सत्ता गठबन्धनका प्रमुख दलहरूले रास्वपालाई सरकारमा फर्काउन उच्चस्तरीय राजनीतिक संयन्त्रको बैठकमा छलफल गरिरहेका छन् । अर्कोतिर उपनिर्वाचनअघि राष्ट्रपतिको निर्वाचन हुँदै छ ।

आयोगले फागुन २५ गते राष्ट्रपतिको निर्वाचनको मिति तोकेको छ । उपनिर्वाचनमा गठबन्धनका साझा उमेदवार लामिछाने नै बन्नेछन् वा दलहरूले छुट्टाछुट्टै उमेदवार उठाउनेछन् भन्ने कुरा राष्ट्रपति निर्वाचनको परिणामले निर्धारण गर्नेछ ।

एमाले र माओवादी नेता भन्छन्– उमेदवारीबारे छलफल हुनै बाँकी छ

सत्तारूढ दलहरू नेकपा (माओवादी केन्द्र) र नेकपा (एमाले)मा चितवन–२ को उमेदवारीबारे छलफल भइसकेको छैन । पार्टी र गठबन्धनमा छलफल भइसकेपछि मात्रै उमेदवारबारे भन्न सकिने ती दलका नेताहरूको भनाइ छ ।

एमाले उपाध्यक्ष सुरेन्द्र पाण्डे उमेदवारका विषयमा छलफल नै सुरु नभएको बताउँछन् । “उमेदवारबारे अहिले केही भएको छैन । छलफलपछि टुंगो लाग्छ,” उनले बाह्रखरीसँग भने ।

माओवादी केन्द्रका महासचिव देव गुरुङ आइतबार मात्रै आयोगले निर्णय गरेकाले उमेदवाबारे छलफल गर्न बाँकी रहेको बताउँछन् । गठबन्धनको साझा उमेदवारको सम्भावनाबारे छलफलपछि मात्रै टुंगो लाग्ने उनको भनाइ छ ।

“हिजो मात्रै निर्वाचन आयोगले सूचना प्रकाशन गरेको छ । पहिले गठबन्धनका नेताहरूसँग छलफल हुन्छ,” गठबन्धको साझा उमेदवार हुन्छ भन्ने प्रश्नमा उनी भन्छन्, “नेताहरूसँग छलफलपछि मात्रै भन्न सकिन्छ ।”

कांग्रेसको ध्यान पहिले राष्ट्रपति त्यसपछि उपनिर्वाचनमा

सरकारलाई विश्वासको मत दिएर प्रतिपक्षमा बसेको नेपाली कांग्रेस भने राष्ट्रपतिको निर्वाचनपछि मात्रै उमेदवारबारे छलफल गर्ने पक्षमा छ । त्यसैले उसले उपचुनावलाई अहिले नै प्राथमिकतामा राखिसकेको छैन ।

नेपाली कांग्रेसका उपसभापति पूर्णबहादुर खड्का आफूहरू राष्ट्रपतिको निर्वाचनबारेको छलफलमा केन्द्रित रहेको बताउँछन् । त्यसपछि मात्रै उपनिर्वाचनबारे छलफल हुने उनको भनाइ छ ।

“अहिले हामी राष्ट्रपतिको निर्वाचनमा केन्द्रित छौँ । उपनिर्वाचनको छलफल सुरु भएको छैन,” उपसभापति खड्काले बाह्रखरीसँग भने, “बैठक बसेर हामी अघि बढ्छौँ ।”

गत मंसिर ४ गते भएको निर्वाचनमा चितवन–२ बाट निर्वाचित भएका लामिछानेले ४९ हजार ३०० मत प्राप्त गरेका थिए । उनका निकटतम प्रतिष्पर्धी कांग्रेसका उमेश श्रेष्ठले १४ हजार ९८८ मत प्राप्त गरेका थिए । तेस्रो बनेका एमालेका कृष्णभक्त पोखरेलले १४ हजार ६५२ मत ल्याएका थिए ।

लामिछानेको पद खारेज भएपछि दोस्रो भएका श्रेष्ठले आफूलाई निर्वाचित घोषणा गरी प्रमाणपत्र दिन माग गर्दै निर्वाचन आयोगमा निवेदनसमेत दिएका थिए । तर, आयोगले त्यस्तो कानुन नभएको भन्दै उनको निवेदन नै अस्वीकार गरेको थियो ।

चितवन–२ मा जिल्ला सभापति राजेश्वर खनाल र पूर्वसभापति जीतनारायण श्रेष्ठ पनि आकांक्षी छन् । उनीहरू बाहिरबाट ल्याएर उमेदवार बनाउँदा फेरि पनि पुरानै परिणाम आउने भनेर नेताहरूको ध्यानाकर्षण गराइरहेका छन् ।

तर, चितवन कांग्रेसको एउटा समूह भने लोकप्रियताका कारण लामिछानेले फेरि पनि चुनाव जित्नसक्ने अवस्था रहेकाले उनलाई टक्कर दिन सक्ने उमेदवार बनाउनुपर्ने पक्षमा छ ।