विराट गोल्डकप : आयोजक र भारतीय क्लब फाइनलमा
सहयात्रा टिभी
विराटनगर । चैत १५, विराटनगरमा जारी विराट गोल्डकपको उपाधिका लागि आयोजक विराटनगर सिटी क्लब र भारतीय टोली लुका सकर क्लबले खेल्ने भएका छन् ।
दोस्रो सेमिफाइनल खेलमा साविक विजेता सशस्त्र प्रहरीलाई हराउँदै लुका सकरले उपाधिका लागि आयोजकसँगको भेट पक्का गरेको हो ।
बुधबार शहीद रंगशालामा भएको दोस्रो सेमिफाइनल खेलमा एपीएफलाई पेनाल्टी सुट आउटमा ४–२ गोलले हराउँदै भारतको लुका सकर क्लब फाइनल प्रवेश गरेको हो । निर्धारित ९० र अतिरिक्त थप गरिएको ३० मिनेटको खेल गोलरहित बराबरीमा सकिएपछि खेल पेनाल्टीमा गएको थियो ।
पेनाल्टीमा सशस्त्रका दिपेश धिमाल र सविन गुरुङले गोल गरे । विशाल सत्याङ र गोलकिपर राजु नगरकोटी गोल गर्नबाट चुके । लुका सकरका लागि चाक्लेस, मोहोमद रफी, मो. आरसानो र पउल ओपारेले गोल गरे ।
प्रतियोगिताको फाइनल खेल बिहीबार हुनेछ । उपाधि विजेताले २० लाख १५ हजार नगद पुरस्कार प्राप्त गर्दा उप विजेता हुने टिमले १० लाख २५ हजार प्राप्त गर्ने छ ।