करेन्ट लागेर बुटवलका उद्योगीको निधन

सहयात्रा टिभी

रुपन्देही । बैशख ३, बुटवलका एक प्रतिष्ठित उद्योगी खेमबहादुर श्रीसको आइतबार बिहान निधन भएको छ । काम गर्ने क्रममा करेन्ट लागेर गम्भीर घाइते भएका श्रीसको उपचारको क्रममा काठमाडौँमा मृत्यु भएको हो ।

उनी बुटवल औद्योगिक क्षेत्रका उद्योगी हुन् । एक महिनाअघि नवलपरासीको बर्दघाटमा विद्युतिकरणको काम गर्दा श्रीसलाई करेन्ट लागेर गम्भीर घाइते भएका थिए । ५७ वर्षीय श्रीस नेपाल उद्योग व्यापार महासङ्घका केन्द्रीय सचिवालय सदस्य, महासङ्घ लुम्बिनी प्रदेश कार्यवाहक अध्यक्ष एवं उद्योग व्यापार सङ्घ बुटवलका पूर्व अध्यक्ष हुन् ।

बुटवल औद्योगिक क्षेत्रको बुटवल इलेकट्रोनिक्स एन्ड ट्रान्सफर्मर उद्योगका सञ्चालक श्रीसको निधनले बुटवलको औद्योगिक क्षेत्रलाई ठुलो क्षति पुगेको उद्योग व्यापार सङ्घ बुटवलले जनाएको छ । श्रीसको निधनप्रति उद्योग व्यापार सङ्घ बुटवलका अध्यक्ष गोविन्द गैरे, नेपाल उद्योग व्यापार महासङ्घका महासचिव खिमनारायण पराजुली लगायत शोक वक्तव्य लेख्दै दुःख व्यक्त गरेका छन् ।