प्रिमियर लिगमा आर्सनलको उपाधि यात्रामा धक्का
सहयात्रा टिभी
काठमाडौं । बैशाख ४, इंग्लिश प्रिमियर लिग फुटबलमा वेष्ट ह्याम युनाइटेडसँग बराबरीमा रोकिएपछि आर्सनलको उपाधि यात्रामा धक्का लागेको छ ।
आइतबार राति वेष्ट ह्यामको मैदानमा भएको खेल २–२ गोलको बराबरीमा टुंगिएको हो । खेलको दशौं मिनेटमै २–० ले अग्रता लिएको आर्सनलले आफ्नो अग्रता जोगाउन भने सकेन । आर्सनलको लागि ग्याब्रियल जिसस र मार्टिन ओडेगार्डले १–१ गोल गरेका हुन् ।
वेष्ट ह्याम युनाइटेडका साइद बेन्रहामा र ज्यारेद बोवेनले २ गोल फर्काउदै खेल बराबरी गरेका हुन् । यो बराबरीपछि आर्सनलको उपाधि यात्रामा धक्का लागेको छ । लिगमा ३१ खेलबाट आर्सनलको ७४ अंक भएको छ ।
एक खेल कम खेलेको म्यान्चेस्टर सिटी ७० अंकसहित दोस्रो स्थानमा रहेकाे छ। तेस्रो स्थानको म्यान्चेस्टर युनाइटेडको ५९ अंक रहेकाे छ । आइतबार राति भएको खेलमा नटिङघम फरेस्टलाई २–० ले पराजित गर्दै म्यान्चेस्टर युनाइटेड तालिकाको तेस्रो स्थानमा उक्लिएको हो । खेलमा युनाइटेडलाई विजयी गराउन एन्टोनी र डिएगो डालोटले १–१ गोल गरेका थिए ।