आज ६८औं प्रहरी दिवस विविध कार्यक्रम गरी मनाइयो
सहयात्रा टिभी
काठमाडौं । कात्तिक १, नेपाल प्रहरीको ६८औं प्रहरी दिवस विविध कार्यक्रम गरी मनाइएको जानकारी प्राप्त भएको छ ।
६८औं प्रहरी दिवसको अवसरमा प्रहरी प्रधान कार्यालयमा विभिन्न विधामा उत्कृष्ट कार्य गर्ने प्रहरी कर्मचारीहरु, प्रहरीलाई सम्मानपत्र, कदरपत्र, पुरस्कार एवं विविध अलङ्कार तथा पदक प्रदान गरिएको छ ।
प्रहरी महानिरीक्षक कुँवरले नेपाल प्रहरी अन्तर प्रदेश कार्यदक्षता मूल्याङ्कन (पुलिस व्याटन) २०८० अन्तर्गत आ-आफ्नो विधामा उत्कृष्ट कार्य गर्नेहरूलाई पुरस्कार प्रदान गरेका हुन् ।
यसैगरी महिला बालबालिका तथा जेष्ठ नागरिक सेवा केन्द्रहरूमा कार्यरत प्रहरी कर्मचारीहरूलाई प्रोत्साहन तथा उच्च मनोबल प्रदान गर्नको लागि यसै वर्षदेखि यूनिसेफ नेपालको सहकार्यमा पुरस्कार प्रदान गरिएको छ ।
नेपाल प्रहरीलाई शान्ति सुरक्षा र अपराध अनुसन्धानमा सहयोग पुर्याउने अवकास प्राप्त प्रहरी उपरीक्षक ध्रुवरत्न हाडा, अवकास प्राप्त प्रहरी निरीक्षक श्याने राना र विश्वव्यापी रूपमा फैलिएको कोरोना भाइरस संक्रमणको समयमा र डेङ्गु नियन्त्रणको लागि नेपाल प्रहरीलाई स्वास्थ्य सुरक्षाको सामग्री उपलब्ध गराई सहयोग गर्ने समाजसेवी रमेश केसीलाई सम्मानपत्र प्रदान गरिएको छ।
साथै नेपाल प्रहरी स्मारक गुठिका ९ जना आजीवन सदस्यहरूले समेत कदरपत्र पाएका छन् ।