रौतहटमा ट्यांकरको ठक्करबाट दुई जनाको मृत्यु
सहयात्रा टिभी
रौतहट । पुस १७, रौतहटमा तेल बोक्ने ट्यांकरले अटो गाडीलाई ठक्कर दिँदा दुई जनाको मृत्यु भएको छ। सोमबार राति साढे ७ बजे चन्द्रनिगाहपुरस्थित पूर्वपश्चिम राजमार्ग चिडिया दहचोकमा दुर्घटना हुँदा दुई जनाको मृत्यु भएको जिल्ला प्रहरी कार्यालय रौतहटकी डिएसपी एलिजा गिरीले जानकारी दिइन्।
गएराति ज १ झ ४४८५ नम्बरको ट्यांकरले प्रदेश २-०३-००१ ख १९२७ नम्बरको अटो गाडीलाई ठक्कर दिएको थियो। ठक्कर दिँदा अटोमा सवार ६ जना घाइते भएका थिए। घाइतेहरूलाई वीरगञ्जस्थित नारायणी अस्पतालमा लगिएको थियो। त्यहाँ उपचारको क्रममा दुई जनाको मृत्यु भएको डिएसपी गिरीले बताइन्।
मृतक ४० वर्षीया पिंकु सिंह र २० वर्षीय अब्देश राम छन्। अन्य घाइतेको उपचार जारी छ। प्रहरीका अनुसार उनीहरूको अवस्था सामान्य छ। प्रहरीले घटनाको थप अनुसन्धान अघि बढाएको छ।