उपाधिका लागि नेपालले नेदरल्यान्ड्ससँग खेल्दै
सहयात्रा टिभी
काठमाडौं । फागुन २२, टी ट्वान्टी त्रिकोणात्मक क्रिकेट सिरिजका लागि मंगलबार नेपाल र नेदरल्याण्ड्स भिड्दैछन् ।
कीर्तिपुर मैदानमा हुने खेल नेपाली समय अनुसार बिहान साढे ११ बजे सुरु हुनेछ ।
लिग चरणको खेलमा शीर्ष दुई स्थानमा रहँदै दुवै टिम फाइनल पुगेका हुन् । नामिबियाले भने फाइनलमा स्थान बनाउन सकेन ।
सिरिजको सुरुवाती दुई खेल नेपालले गुमाएको थियो । पहिलो खेलमा नामिबियासँग २० रनले पराजित नेपालले दोस्रो खेलमा नेदरल्याण्ड्ससँग २ रनको हार ब्यहोरेको थियो ।
तेस्रो खेलमा नामिबियालाई २ रनले हराएर पहिलो जित दर्ता गरेको नेपालले अन्तिम खेलमा नेदरल्याण्ड्सलाई ६ विकेटले हराउँदै उत्कृष्ट कमब्याक गरेको थियो ।
विश्वकप क्रिकेटको तयारी स्वरुप नेपालले टी ट्वान्टी त्रिकोणात्मक सिरिजको आयोजना गरेको हो ।
विश्वकप लिग टू अन्तर्गतका खेल खेल्न नेपाल आएको नेदरल्याण्ड्स र नामिबियालाई समावेश गरेर नेपाल क्रिकेट संघ क्यानले सिरिजको आयोजना गरेको हो ।