शिक्षकले चन्दा संकलन गरेर खोटाङका अग्निपीडितलाई सहयोग
सहयात्रा टिभी
काठमाडौँ । वैशाख २५, शिक्षकले चन्दा संकलनगरेर हलेसी तुवाचुङ नगरपालिका–९ सल्लेका अग्निपीडित परिवारलाई १ लाख ७६ हजार रुपैयाँ सहयोग गरिएको छ ।
उनीहरुलाई खोटाङका विभिन्न स्कुलमा कार्यरत १ सय ५१ शिक्षकले चन्दा संकलन गरेर सहयोग रकम हस्तान्तरण गरेका हुन् ।
वैशाख १४ गते जंगलमा लागेको डढेलो गाउँमा फैलिँदा घर जलेर ७ परिवार विस्थापित भएका थिए । पीडितलाई क्षतिको मूल्यांकन गरेर १२ देखि ४५ हजार रुपैयाँसम्म प्रदान गरिएको सहयोग संकलन अभियानका संयोजक एवं कालिका आधारभूत विद्यालय नवलपुरका शिक्षक दिलीप वाम्बुलेले जानकारी दिए ।
आगलागीमा घर तथा घरमा भएका सम्पूर्ण सामग्री गुमाएका परिवारलाई ४५ हजार रुपैयाँ उपलब्ध गराइएको छ । संकलित रकम सल्लेका वडाध्यक्ष काशीराज राईको उपस्थितिमा प्रदान गरिएको हो ।
आगलागीबाट एक करोड ३३ लाख रुपैयाँ बराबरको धनमाल नष्ट भएको स्थानीय प्रशासनले जनाएको छ । जिल्लामा गत साउनदेखि हालसम्म ९९ वटा घर जलेका प्रहरीले बताएको छ ।