बालोन डे’ओरको मनोनयन सार्वजनिक, मेसी र रोनाल्डो परेनन्

सहयात्रा टिभी

काठमाडौं । भदौ २० , लिओनल मेसीलाई धेरैले अहिलेसम्मकै उत्कृष्ट फुटबल खेलाडी मान्दै आएका छन्। तर, अर्जेन्टिनाका स्टार मेसी यस वर्षको बालोन डी’ओर अवार्डको मनोनयनमा पर्न सकेनन्।

कीर्तिमानी आठ पटकका विजेता मेसीसँगै पोर्चुगलका भेट्रान स्ट्राइकर क्रिस्टियानो रोनाल्डो पनि अक्टोबर २८ मा प्रदान गरिने अवार्डको दौडमा रहेका ३० खेलाडीको सूचीमा अटाउन सकेनन्।

भिनिसियस जुनियर, रोड्री, जुड बेलिङ्घम, केलियन एमबाप्पे, एर्लिङ हालान्ड र ह्यारी केन मनोनयनमा परेका छन्। गत वर्ष पेरिस सेन्ट जर्मेन (पिएसजी)बाट इन्टर मियामीमा जाँदा युरोपियन फुटबललाई पछाडि छाडेका मेसीले अझै पनि उच्चस्तरमा प्रदर्शन गरिरहेका छन्।

उनको कप्तानीमा जुलाईमा अर्जेन्टिनाले कोपा अमेरिका जितेको थियो। मेसी सन् २००६ मा पहिलोपल्ट बालोन डी’ओर अवार्डका लागि मनोनीत भएका थिए। तर, उनले त्यसको तीन वर्षपछि मात्रै उक्त अवार्ड जितेका हुन्।

मेसी र रोनाल्डोले आफ्नो क्यारियरको शिखरमा लगभग दुईतर्फी प्रतिस्पर्धा गरे। २००८ देखि उनीहरूले यो अवार्ड संयुक्त रूपमा १३ पटक जितेका थिए। मनोनयनको सूचीबाट उनीहरूको नाम हट्नुको कारण शीर्ष उडानमा रहेको युरोपियन क्लब फुटबल छोड्नुको कारण मान्न सकिन्छ।

इङ्लिस प्रिमियर क्लब म्यानचेस्टर युनाइटेड छाडेर रोनाल्डो साउदी अरबको अल-नासर सरेका थिए। मनोनयनमा परेका एमबाप्पे, भिनिसियस जुनियर, बेलिङ्घम र हालान्ड नयाँ पुस्ताका प्रतिभावान् खेलाडी हुन्। स्पेनका उदीयमान किशोर स्टार लामिन यमल पनि यो सूचीमा अटाउन सफल भएका छन्।

गत वर्ष मेसीले म्यानचेस्टर सिटीका स्ट्राइकर हालान्डलाई पछि पार्दै अवार्ड जितेका थिए। यस पटकको यो अवार्ड जित्ने प्रबल दाबेदार रियल मड्रिडका भिनिसियस जुनियर र बेलिङ्घमका साथै सिटी र स्पेनका मिडफिल्डर रोड्रीलाई लिइएको छ।

मेसी सन् २०२२ मा पनि मनोनयनको सूचीमा अटाउन सकेका थिएनन्। तर, उनले अर्जेन्टिनालाई सोही वर्षको अन्त्यमा विश्वकपको उपाधि जिताएका थिए। त्यसैले उनले सन् २०२३ मा आठौं पटक बालोन डी’ओर जिते।

गत वर्ष महिलातर्फको बालोन डी’ओर अवार्ड जितेकी आइताना बोनमती पुनः मनोनयनमा परेकी छन्। अमेरिकी स्टार ट्रिनिटी रोडम्यान, सोफिया स्मिथ, म्यालोरी स्वानसन, एलिसा नेहर र लिन्डसे होरान पनि ३० दाबेदारको सूचीमा छन्।

सन् १९५६ मा फ्रान्सका स्टेनली म्याथ्युजलाई बालोन डी’ओर प्रदान गरिएको थियो। युसेबियो, बबी चार्लटन, जर्ज बेस्ट, जोहान क्रुफ, फ्रान्ज बेकेनबाउर, रोनाल्डो र जिनेदिन जिदानले यसअघि यो अवार्ड जितिसकेका छन्।