प्रहरीमा दुई एआइजी सिफारिस, अवकाशको मुखमा ‘बढुवा पुरस्कार’
सहयात्रा टिभी
काठमाडौं । कात्तिक ५, सरकारले उमेरहदका कारण अवकाश हुनु १२ दिनअघि नेपाल प्रहरीकी डीआइजी किरण राणालाई एआइजी बढुवा सिफारिस गरेको छ ।
गृह मन्त्रालयले आइतबार बेलुकी बढुवा समितिको बैठक बोलाई राति नै सिफारिस सूची प्रकाशित गरेको छ । राणासँगै प्रहरी अस्पतालमा कार्यरत प्राविधिक डीआइजी डा. सुन्दरप्रसाद ह्वोजु पनि एआइजी बढुवा सिफारिसमा परेका छन् । प्रशासन समूहमा राणा र प्राविधिकमा ह्वोजु एकल सिफारिस भएका हुन् । भदौ २६ मा उमेरहदकै कारण अवकाश भएका एआइजी श्यामलाल ज्ञवालीको रिक्त दरबन्दीमा राणालाई बढुवा गर्न सिफारिस गरिएको हो ।
यसअघि सरकारले अवकाशको मुखैमा डीआइजी पोषराज पोखरेललाई एआइजीमा बढुवा सिफारिस गर्यो । तर, मन्त्रिपरिषदबाट सिफारिस स्वीकृत नहुँदै असार २१ गते उमेरहदका कारण उनले डीआइजी दर्जामै अवकाश पाए । सिफारिस गरेर पनि बढुवा स्वीकृत नगरिँदा आफूमाथि अन्याय भएको भन्दै उनले सर्वोच्च अदालतमा दायर गरेको रिट विचाराधीन छ ।