सत्ता स्वार्थका लागि घुँडा टेक्नु राष्ट्रिय हितको पक्षमा हुँदैन : प्रधानमन्त्री ओली
सहयात्रा टिभी
काठमाडौं । माघ ७, प्रधानमन्त्री केपी शर्मा ओलीले राष्ट्रिय स्वार्थलाई तिलाञ्जली दिएर सत्ता स्वार्थका लागि घुँडा टेक्नु राष्ट्रिय हितको पक्षमा हुँदैन भनी अभिव्यक्ति दिएका छन् ।
नेकपा (एमाले) को परराष्ट्र मामिला विभागले सोमबार आयोजना गरेको ‘नेपालको परराष्ट्र नीतिबारे सांसद संवाद’ कार्यक्रमलाई सम्बोधन गर्दै प्रधानमन्त्री ओलीले सानो देश हौँ भन्ने हिनताभाव पाल्नु पर्ने आवश्यकता नरहेको पनि बताए ।
राष्ट्रिय हितभन्दा सत्ता स्वार्थ र स–साना कुराहरूलाई महत्व दिने प्रवृत्ति गलत भएको उल्लेख गर्दै प्रधानमन्त्री ओलीले आर्थिक, सांस्कृतिक र कूटनीतिक हितलाई ध्यान दिएर नेपालले विश्वसनीय र जिम्मेवार रूपमा आफूलाई प्रस्तुत गर्ने बताए ।
कार्यक्रममा विश्व व्यवस्थामा नेपालको परराष्ट्र नीति, बदँलिदो भू–राजनीतिक परिवेश, जलवायु राजनीति र कूटनीतिजस्ता विषयमा परराष्ट्र मामिला विज्ञहरूले कार्यपत्र प्रस्तुत गरेका थिए ।
प्रधानमन्त्रीले नेपाल न्यायोचित र अन्तर्राष्ट्रिय हितसहितको राष्ट्रिय हितका पक्षमा रहेको पनि स्पष्ट गरे । साना र ठूला राष्ट्रको हित समान हित हो भन्ने मान्यताका साथ नेपालको सार्वभौमिकता, स्वाभीमान र भौगोलिक अखण्डताका पक्षमा नेपाल सदैव कटिबद्ध रहने उनको भनाइ थियो ।