आन्दोलनस्थलबाट भागेर धर्मगुरु खतिवडाको घर पुगेका थिए दुर्गा प्रसाईं
सहयात्रा टिभी
काठमाडौं । चैत १६, राजावादी आन्दोलनको फिल्ड कमान्डरको रुपमा खटिएका दुर्गा प्रसाईंलाई प्रहरीले खोजी गरिरहेको छ ।
शुक्रबार तीनकुने क्षेत्रमा आन्दोलनका क्रममा तोडफोड, आगजनी र आतंक मच्चाउन उक्साएर भागेका प्रसाईं घरमा नगई हिजोदेखि भूमिगत भएका छन् । उनी राजा फर्काउने आन्दोलनका जनकमाण्डर बनाइएका थिए ।
केहीबेर सटरमा लुकेका उनी त्यहाँबाट सिधै विवादास्पद धर्मगुरु पुस्कर खतिवडाको ललितपुरस्थित इमाडोलस्थित घरमा गएको पाइएको ललितपुर प्रहरी परिसरका प्रमुख एसएसपी श्यामकृष्ण अधिकारीले बताए ।
अधिकारीका अनुसार खतिवडालाई भने पक्राउ गरिसकिएको छ ।
‘तीनकुने क्षेत्रबाट भागेर पण्डित पुस्कर खतिवडाको घरमा राति गएर बसेका रहेछन् । हामीले खतिवडालाई भने पक्रिसकेका छौं’, एसपी अधिकारीले भने ।
अब पुलिसले नछाड्ने भन्दै प्रसाईं खतिवडाको घरबाट स्याउ र केरा खाएर मोबाइल स्वीच अफ गरेर निस्किएको प्रहरीले बताएको छ । प्रहरीले गरेको लोकेसन ट्रयाकमा पछिल्लो पटक उनी इमाडोल क्षेत्रमा देखिएका छन् ।
उच्च सुरक्षास्रोतका अनुसार उक्त प्रदर्शनको अगुवाइ गरेका प्रसाईंविरुद्ध मानवहत्याको अभियोगमा मुद्दा चलाउने तयारी छ ।
अराजकता मच्चाएको तथा उकासेको आरोपमा प्रहरीले राप्रपाका वरिष्ठ उपाध्यक्ष रवीन्द्र मिश्र, महामन्त्री धवलशमशेर राणा, वकिल स्वागत नेपाललगायतलाई पक्राउ गरिसकेको छ ।