कांग्रेसको विधान संशोधन मस्यौदा समिति अझै बन्न सकेन
सहयात्रा टिभी
काठमाडौं । चैत २०, नेपाली कांग्रेसको १६ भदौमा सम्पन्न केन्द्रीय कार्यसमिति बैठकले विधान संशोधन मस्यौदा समिति गठन गर्ने निर्णय गरेका थियो । तर, सात महिना पूरा भइसक्दा पनि यो निर्णय कार्यान्वयन भएको छैन ।
विधानलाई समयानुकूल संशोधन र परिमार्जन गर्ने गरी मस्यौदा बनाउन कांग्रेसले विधान संशोधन मस्यौदा समितिको परिकल्पना गरेको हो ।
निर्णयमा भनिएको थियो, ‘पार्टीको तहगत संगठनात्मक संरचनालाई कार्यमूलक बनाउने लगायत विधानसँग जोडिएका विभिन्न विषयमा सघन छलफल एवं सुझाव सङ्कलन गरी विधानमा समयानुकूल संशोधन र परिमार्जनका लागि मस्यौदा तयार गर्न नेपाली कांग्रेसको विधान, २०१७ को धारा २२ (७) बमोजिम विधान संशोधन मस्यौदा समिति गठन गर्ने ।’
सोही बैठकले नेताहरूसँग आवश्यक परामर्श गरी विधान संशोधन मस्यौदा समिति गठन गर्ने अधिकार सभापति शेरबहादुर देउवालाई दिएको थियो । तर, निर्णय भएको सात महिना बितिसक्दा पनि सभापति देउवाले समिति गठन गरेका छैनन ।
एक नेताका अनुसार विधान मस्यौदा समितिको संयोजक कसलाई बनाउने भन्नेमा देउवा द्विविधामा रहेका छन् ।