काठमाडौंमा ‘शून्य फोहोर क्याफे’ कार्यक्रमको सुरुवात

सहयात्रा टिभी

काठमाडौं । बैशाख ११, विश्व पृथ्वी दिवसको अवसरमा ब्लू वेस्ट टु भ्यालु प्रालिले काठमाडौंमा खाद्य फोहोर घटाउने र त्यसको सही उपयोग गर्ने उद्देश्यले “शून्य फोहोर क्याफे” कार्यक्रमको सुरुवात गरेको छ। डीसीए इनोभेसन फन्डको सहयोगमा आयोजित यो कार्यक्रमको नारा “हाम्रो शक्ति, हाम्रो ग्रह” छ।

यो कार्यक्रमले काठमाडौंमा एउटा विशेष क्याफे खोल्ने योजना बनाएको छ, जसले मानिसहरूलाई फोहोर कम गर्न, खानामा ध्यान दिन र फोहोर खानालाई उपयोगी बनाउन प्रेरित गर्नेछ। क्याफेले प्लास्टिक र जटिल सामग्रीको सट्टा वातावरणमैत्री विकल्प प्रयोग गर्नेछ। यहाँ खानाको गुणस्तर जाँचेर सस्तो र स्वादिष्ट परिकार उपलब्ध गराइनेछ, जसले फोहोर कम गर्न र खाना बनाउने मेहनतको कदर गर्न सहयोग गर्नेछ।

यो क्याफेले ग्राहकलाई फोहोर कम गर्ने, पुन:प्रयोग गर्ने र पुनर्चक्रण गर्ने तरिका सिकाउनेछ। यदि यो क्याफे सफल भयो भने, अन्य क्याफे, रेस्टुरेन्ट र होटलले पनि फोहोर व्यवस्थापनका समस्याहरू समाधान गर्न र वातावरणमैत्री तरिका अपनाउन सक्नेछन्।

ब्लू वेस्ट टु भ्यालु प्रा.लि.का सह–संस्थापक तथा प्रमुख कार्यकारी अधिकृत नबिन विकास महर्जनले कार्यक्रमका गतिविधिहरू प्रस्तुत गरेका थिए । उनले यो क्याफेले उपभोक्ताहरूलाई फोहोर न्यूनीकरणबारे जागरूक गराउने, खानपानमा सचेत बनाउने, फोहोर खानालाई मूल्यवान बनाउने र प्लास्टिक तथा जटिल सामग्रीको विकल्प प्रयोग गरी स्रोत व्यवस्थापनको उत्कृष्ट मोडल प्रदर्शन गर्ने बताए ।

कार्यशालामा काठमाडौं, ललितपुर, कीर्तिपुर र शंखरापुरका प्रतिनिधि, होटल र क्याफे सञ्चालक, मास्टर सेफ सन्तोष शाह, डा. नरेश रिमाल, डा. संझना बिष्ट,  सरिता राई र अमृत कुमार धितालले यो नवीन कार्यक्रमको महत्त्वमाथि प्रकाश पार्दै सफलताको शुभकामना दिए।

फोहोर व्यवस्थापन नगरपालिकाहरूका लागि ठूलो चुनौती बनेको छ। ब्लू वेस्ट टु भ्यालुले सन् २०१४ देखि व्यवसाय, नगरपालिका र अस्पतालहरूका लागि फोहोर व्यवस्थापनका समाधान प्रदान गर्दै आएको छ। कम्पनीले फोहोरलाई पुनर्चक्रण र अपसाइक्लिङ गरी उपयोगी वस्तु बनाउँछ र समुदाय, विद्यार्थी, संगठन र सरकारी कर्मचारीलाई फोहोर व्यवस्थापनमा सहयोग गर्छ।

कार्यक्रममा घर र रेस्टुरेन्टका लागि जैविक फोहोरबाट मल बनाउने मेसिन र जटिल फोहोरबाट नयाँ उत्पादन बनाउने तरिका पनि देखाइयो, जुन ब्लू वेस्ट टु भ्यालुले आफ्नो केन्द्रमा गरिरहेको छ।

यो कार्यक्रमले काठमाडौंलाई सफा र हरियाली बनाउन महत्त्वपूर्ण योगदान दिने विश्वास लिइएको छ।