एक सातादेखि लुक्लाको हवाई उडान प्रभावित
सहयात्रा टिभी
काठमाडौं । वैशाख २३, सोलुखुम्बुको लुक्लाका लागि आज बिहानैदेखि कुनै पनि उडान हुन सकेको छैनन् । मौसममा खराबीका कारण लुक्लाको हवाई उडान ठप्प भएको हो ।
‘बिहानैदेखि लुक्ला उडान हुन सकेको छैन । मौसम खराबीका कारण लुक्लाको उडान ठप्प छ’, त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाले भने ।
प्रवक्ता शेर्पाका अनुसार काठमाडौंस्थित त्रिभुवन अन्तर्राष्ट्रिय विमानस्थलबाट तेन्जिङ हिलारी विमानस्थल लुक्लामा आज एउटा पनि उडान भएको छैन । बिहान ६ बजेदेखि नै उडानको तालिका रहे पनि हालसम्म उडान हुन नसकेको हो ।
समिट, सिता र तारा एयरको बिहान ६ बजे लुक्ला विमानस्थलमा उडान भर्ने तालिका रहेको थियो । त्यसयता बुद्ध, यति र श्री एयरलाइन्सका तालिका अनुसार कुनै उडान हुन सकेको छैन । मोसम खराबीको कारण यी सबै उडान ‘डिले’ तालिकामा राखिएको छ ।
मौसम खराब भएका कारण आइतबार उडान हुने सम्भावना नरहेको तेन्जिङ हिलारी विमानस्थलका एयर ट्राफिक कन्ट्रोलर अमन चन्द्र झाले बताउँछन् । उनका अनुसार मौसमकै कारण लुक्लाको उडान समय समयमा प्रभावित हुँदै आएका छ । पछिल्लो एक साता यतादेखि तालिका अनुसार नियमित उडान हुन नसकेको उनले जानकारी दिए ।
लुक्लाको उडान ठप्प हुँदा सोलुखुम्बु र काठमाडौं आवत–जावत गर्ने यात्रुहरू मार्कामा परेका छन् ।