ईसाई धर्मगुरु पोप लियोको पहिलो सम्बोधनमा दिगो शान्तिको कामना
सहयात्रा टिभी
काठमाडौं । वैशाख २९, क्याथोलिक ईसाई धर्मगुरु पोप लियोले भ्याटिकन सिटीबाट पहिलो पटक मानिसहरूलाई सम्बोधन गर्नुभएको छ ।
आफ्नो पहिलो सम्बोधनमा उहाँले विश्वका शक्तिशाली देशहरूलाई अब युद्ध नगर्न अपील गर्नुभएको बीबीसीले जनाएको छ ।
सम्बोधनका क्रममा पोप लियोले युक्रेनमा शान्ति र गाजामा युद्धविरामको बारेमा चर्चा गर्नुभयो । उहाँले गाजामा भइरहेका घटनाहरूबाट आफूलाई गहिरो दुःख लागेको बताउनुभयो ।
यसका साथै उहाँले भारत र पाकिस्तानबीच भएको युद्धविरामको पनि स्वागत गर्नुभएको छ । पोप लियोले भारत र पाकिस्तानबीच दिगो मेलमिलापको आशा व्यक्त गर्दै युक्रेनका लागि पनि दिगो शान्तिको कामना गर्नुभयो ।
पोप फ्रान्सिसको मृत्युपछि पोप लियो क्याथोलिक चर्चको नयाँ पोप निर्वाचित हुनुभएको हो ।