भारतमा कोरोना संक्रमण बढ्यो: नयाँ भेरियन्टको त्रास, १२ जनाको मृत्यु

सहयात्रा टिभी

काठमाडौं । जेठ १४, छिमेकी मुलुक भारतमा कोरोना भाइरसको संक्रमण पुनः बढ्न थालेको छ। हाल देशभर सक्रिय संक्रमितको संख्या १,०८१ पुगेको छ भने नयाँ भेरियन्टसहितको संक्रमणका कारण १२ जनाको मृत्यु भइसकेको छ।

भारतीय सञ्चार माध्यमका अनुसार मंगलबार कर्नाटकमा ३६, गुजरातमा १७ (१३ निको), बिहारमा ६ र हरियाणामा ३ नयाँ संक्रमित थपिएका छन्। सबैभन्दा बढी सक्रिय संक्रमित केरल राज्यमा ४३० जना रहेका छन्। उत्तर प्रदेशको फिरोजाबादमा मंगलबार एक ७८ वर्षीय कोरोना संक्रमित वृद्धको मृत्यु भएको छ, जुन प्रदेशमा कोरोनाको नयाँ भेरियन्टबाट भएको पहिलो मृत्यु हो। यसबाहेक महाराष्ट्र, राजस्थान, पश्चिम बंगाल, कर्नाटक र मध्य प्रदेशमा गरी थप ११ जनाको मृत्यु भएसँगै कुल मृतक संख्या १२ पुगेको छ।

चार नयाँ भेरियन्ट र जेएन.१ को प्रभाव

भारतीय चिकित्सा अनुसन्धान परिषद् (आईसीएमआर) का निर्देशक डा. राजीव बहलले भारतमा एलएफ.सेभेन, एक्सएफजी, जेएन.१ र एनबी.१.८.१ गरी चार नयाँ कोरोना भेरियन्ट देखिएको जानकारी दिएका छन्। उनका अनुसार, अवस्था हाल गम्भीर नभए पनि सावधानी अपनाउनु जरुरी छ। विश्व स्वास्थ्य संगठन (डब्लुएचओ) ले पनि यी भेरियन्टलाई ‘चिन्ताजनक’ नभई ‘निगरानी योग्य’ श्रेणीमा राखेको छ।

भारतमा हाल जेएन.१ भेरियन्ट सबैभन्दा बढी फैलिएको छ; परीक्षण गरिएका आधाभन्दा बढी नमूनामा यही भेटिएको छ। यो ओमिक्रोनको बीए.२.८६ भेरियन्टको उप-प्रजाति हो, जुन पहिलोपटक अगस्त २०२३ मा देखिएको थियो र डिसेम्बर २०२३ मा डब्लुएचओले ‘विशेष चासोको भेरियन्ट’ (Variant of Interest) घोषणा गरेको थियो। यसमा रहेका करिब ३० म्युटेसनले प्रतिरक्षा प्रणालीलाई कमजोर बनाउन सक्छ। अमेरिकाको जोन्स हप्किन्स युनिभर्सिटीका अनुसार, जेएन.१ छिटो फैलिने भए पनि गम्भीर प्रकृतिको छैन र विश्वका धेरै देशमा प्रमुख भेरियन्ट बनेको छ। यसका लक्षण केही दिनदेखि हप्तासम्म देखिन सक्छन् र लामो समयसम्म रहे ‘लङ्ग कोभिड’ को जोखिम हुनसक्ने विज्ञहरू बताउँछन्।

त्यस्तै, एनबी.१.८.१ भेरियन्ट पनि आफ्नो स्पाइक प्रोटिनमा भएको म्युटेसनका कारण छिटो फैलने र अघिल्लो संक्रमण वा खोपबाट प्राप्त प्रतिरक्षालाई छल्न सक्ने क्षमता राख्दछ। स्वास्थ्य विज्ञहरूले सावधानी अपनाउन र कोभिड-उपयुक्त व्यवहार पालन गर्न आग्रह गरेका छन्।