पतञ्जलि जग्गा अनियमितता: याक एण्ड यतीका सञ्चालकविरुद्ध पनि मुद्दा, ५१ लाख बिगो दाबी
सहयात्रा टिभी
काठमाडौं । जेठ २३, पतञ्जलि योगपीठलाई दिइएको हदबन्दीभन्दा बढीको जग्गा अनियमितता प्रकरणमा देशका प्रतिष्ठित होटल व्यवसायीसमेत मुछिएका छन्। अख्तियार दुरुपयोग अनुसन्धान आयोगले चर्चित होटल याक एण्ड यती र हायात रिजेन्सीका संस्थापक स्वर्गीय राधेश्याम सराफ, उनका छोरा अरुण कुमार सराफसहित ९३ जनाविरुद्ध विशेष अदालतमा भ्रष्टाचार मुद्दा दायर गरेको छ।
अख्तियारका अनुसार, सराफ सञ्चालक रहेको चौताराम प्रालिको नाममा पहिले गैरकानुनी रूपमा हदबन्दीभन्दा बढीको जग्गा दर्ता गराई, पछि सोही जग्गा पतञ्जलि योगपीठ नेपालको नाममा हस्तान्तरण गरेर सरकारी सम्पत्तिमा हानि-नोक्सानी पुर्याइएको हो। यही अनियमिततामा संलग्न भएको आरोपमा अख्तियारले उनीहरूविरुद्ध ५१ लाख रुपैयाँ बिगो र कैद सजाय माग गरेको छ।
यो प्रकरणको एक महत्त्वपूर्ण पक्ष के छ भने, केही वर्षअघि निधन भइसकेका राधेश्याम सराफलाई पनि प्रतिवादी बनाइएको छ। भ्रष्टाचार निवारण ऐन, २०५९ को प्रावधान अनुसार, उनको मृत्यु भइसकेकाले बिगो असुल उपर गर्ने प्रयोजनका लागि उनका हकवाला छोरा अरुण कुमार सराफलाई प्रतिवादी बनाइएको अख्तियारले स्पष्ट पारेको छ।
चौताराम प्रालिका सञ्चालकको हैसियतमा राधेश्याम सराफ यो प्रकरणमा जोडिएका हुन्। अख्तियारको यो कदमले ठूला व्यावसायिक घरानासमेत सरकारी जग्गा अनियमितताको अनुसन्धानको दायराबाट उम्कन नसक्ने सन्देश दिएको छ।