प्रतिनिधिसभा बैठक बस्दै, बहुप्रतिक्षित निजामती विधेयक पारित गर्ने मुख्य कार्यसूची

सहयात्रा टिभी

काठमाडौं । असार ३, संघीय संसद अन्तर्गतको प्रतिनिधिसभाको बैठक आज (मंगलबार) बस्दैछ। नयाँ बानेश्वरस्थित संसद भवनमा दिउँसो १ बजे सुरु हुने बैठकमा लामो समयदेखि प्रतिक्षारत ‘संघीय निजामती सेवा विधेयक’लाई पारित गर्ने मुख्य कार्यसूची रहेको छ।

संघीय संसद सचिवालयका अनुसार, आजको बैठकमा संघीय मामिला तथा सामान्य प्रशासनमन्त्री राजकुमार गुप्ताले ‘राज्य व्यवस्था तथा सुशासन समितिको प्रतिवेदनसहितको संघीय निजामती सेवा विधेयक, २०८० माथि छलफल गरी पारित गरियोस्’ भनी प्रस्ताव प्रस्तुत गर्नेछन्। यो विधेयक पारित भएमा देशको कर्मचारी प्रशासनमा दूरगामी प्रभाव पार्नेछ।

यसैगरी, बैठकमा राज्य व्यवस्था तथा सुशासन समितिका सभापति रामहरि खतिवडाले ‘नेपाल नागरिकता (दोस्रो संशोधन) विधेयकसम्बन्धी समितिको प्रतिवेदन’ पेस गर्ने कार्यक्रम पनि रहेको छ। कर्मचारी प्रशासन र नागरिकता जस्ता राष्ट्रिय महत्वका दुई महत्वपूर्ण विषयमा छलफल हुने भएकाले आजको बैठकलाई विशेष चासोका साथ हेरिएको छ।