त्रिभुवन विमानस्थल विस्तार : उडान क्षमता २५ प्रतिशतले बढ्ने, जहाज ‘होल्ड’ हुने समस्या हट्दै

सहयात्रा टिभी

काठमाडौं । साउन ९, त्रिभुवन अन्तर्राष्ट्रिय विमानस्थलको क्षमता अभिवृद्धि गर्ने उद्देश्यले सुरु गरिएको विस्तार कार्य तीव्र गतिमा अघि बढेको छ। दैनिक १० घण्टा उडान बन्द गरेर सञ्चालित आयोजनाअन्तर्गत समानान्तर ट्याक्सी-वे निर्माणको काम ६० प्रतिशत सम्पन्न भएको छ।

हवाई यातायात क्षमता अभिवृद्धि आयोजनाका प्रमुख दीपेन्द्र श्रेष्ठका अनुसार, ट्याक्सी-वेसँगै अन्तर्राष्ट्रिय एप्रोन (जहाज पार्किङ क्षेत्र) निर्माण ७५ प्रतिशत र ह्याङ्गर क्षेत्र विकासको काम करिब ५० प्रतिशत सकिएको छ।

विस्तारपछि हुने क्षमता वृद्धि :

२५ प्रतिशत क्षमता वृद्धि: समानान्तर ट्याक्सी-वे निर्माण सम्पन्न भएपछि विमानस्थलको उडान र अवतरण क्षमता २५ प्रतिशतले बढ्नेछ। यसले हाल दैनिक करिब ३०० उडान व्यवस्थापन गरिरहेको विमानस्थललाई थप ७५ वटा उडान सञ्चालन गर्न सक्षम बनाउनेछ।

‘होल्ड’को अन्त्य: जहाजहरू अवतरणपछि तुरुन्तै रनवे छाडेर ट्याक्सी-वेमा जान सक्नेछन्, जसले रनवे छिटो खाली हुन्छ। यसले उडानका लागि पालो कुरेर बस्नुपर्ने र आकाशमा जहाज ‘होल्ड’ हुने समस्याको अन्त्य गर्नेछ।

पार्किङ क्षमता तीन गुणाले वृद्धि: नयाँ अन्तर्राष्ट्रिय पार्किङ-वे बनेपछि हालको ११ वटा जहाजको क्षमता बढेर २९ वटा पुग्नेछ। यसले धेरै अन्तर्राष्ट्रिय वायुसेवालाई उडान अनुमति (स्लट) दिन सहज हुनेछ।

नेपाल आयल निगमको डिपो ‘अवरोध’

आयोजनाको अन्तिम चरणमा नेपाल आयल निगमको इन्धन डिपो स्थानान्तरण नहुँदा केही अवरोध देखिएको छ। ट्याक्सी-वेलाई एप्रोनसम्म जोड्न डिपो सार्नु अनिवार्य रहेको नागरिक उड्डयन प्राधिकरण (क्यान)का महानिर्देशक प्रदीप अधिकारीले बताए।

प्राधिकरणले डिपो सार्नका लागि आवश्यक जग्गा उपलब्ध गराइसकेको र भाडा छुटसम्बन्धी विषय पनि मन्त्रालयमा पठाइसकेको जनाएको छ। अधिकारीका अनुसार, निगमले उक्त निर्णय नआउँदै पनि सम्झौता गरेर काम थाल्न सक्ने अवस्था छ।

भविष्यको योजना र लगानी

विमानस्थल गुरुयोजनाअन्तर्गत हालको अन्तर्राष्ट्रिय टर्मिनल भवनलाई आन्तरिक उडानका लागि प्रयोग गरी अत्याधुनिक सुविधायुक्त नयाँ अन्तर्राष्ट्रिय टर्मिनल भवन बनाउने योजना छ। करिब ५० अर्ब लागत अनुमान गरिएको यो आयोजनाका लागि लगानी जुटाउनु चुनौतीपूर्ण रहेको प्राधिकरणको भनाइ छ।

हाल विमानस्थलमा समानान्तर ट्याक्सी-वे, अन्तर्राष्ट्रिय पार्किङ-वे र कनेक्टिङ ट्याक्सी-वे गरी करिब १४ अर्ब रुपैयाँ बराबरका तीन ठूला आयोजनाहरू सञ्चालनमा छन्। यी आयोजनाहरूले विमानस्थलको सेवालाई अन्तर्राष्ट्रिय स्तरको बनाउन महत्त्वपूर्ण भूमिका खेल्ने अपेक्षा गरिएको छ।