चलचित्र ‘रिमै’ को ट्रेलर सार्वजनिक, ग्रामीण कथामा दयाहाङको संघर्ष
सहयात्रा टिभी
काठमाडौं । भदौ ९ , निर्देशक खिलबहादुर गुरुङको बहुप्रतिक्षित चलचित्र ‘रिमै’को ट्रेलर सार्वजनिक गरिएको छ। ट्रेलरले ग्रामीण परिवेश, प्रेम, सामाजिक द्वन्द्व र पारिवारिक संघर्षको कथालाई मार्मिक ढंगले प्रस्तुत गरेको छ, जसले दर्शकमाझ कौतुहलता जगाएको छ।
तीन मिनेट लामो ट्रेलरमा मुख्य अभिनेता दयाहाङ राईलाई गाउँले युवकको भूमिकामा देख्न सकिन्छ, जो आफ्नो प्रेम र पारिवारिक दायित्वको बीचमा पिसिएका छन्। अभिनेत्री रिश्मा गुरुङसँगको उनको भावुक रसायनले कथाको भावनात्मक पक्षलाई बलियो बनाएको छ। साथै, अर्पण थापा र गौमाया गुरुङ जस्ता कलाकारहरूको उपस्थितिले कथामा थप गहिराइ र रहस्य थपेको छ।
निर्देशक गुरुङले फिल्ममार्फत परम्परागत संस्कृति र आधुनिकताबीचको द्वन्द्वलाई कलात्मक रूपमा देखाउन खोजेको ट्रेलरबाट अनुमान लगाउन सकिन्छ। उपेन्द्र सुब्बाको पटकथा, शैलेन्द्रध्वज कार्कीको सुन्दर छायांकन र पार्श्व संगीतले दर्शकलाई कथाभित्रै खिच्न सफल देखिन्छ।
गोरखा सिरानचोक एण्ड लिगलिगकोट फिल्मस् प्रालीको प्रस्तुतिमा बनेको यो फिल्ममा दयाहाङ, रिश्मा, अर्पण र गौमायासँगै कविता आले मगर, माओत्से गुरुङ, पुस्कर गुरुङ लगायतका कलाकारहरूको अभिनय रहेको छ।