रूसले युक्रेनमाथि गर्यो ड्रोन क्षेप्यास्त्र प्रहार
सहयात्रा टिभी
काठमाडौं । भदौ १३, रूसले बिहीबार युक्रेनमाथि ५९८ वटा ड्रोन र ३१ वटा क्षेप्यास्त्रले आक्रमण गरेको छ।
बीबीसीका अनुसार, यस आक्रमणमा ४ बालबालिकासहित २१ जनाको मृत्यु भएको छ भने ४५ जना घाइते भएका छन्। आक्रमण अमेरिकी राष्ट्रपति ट्रम्प र रूसी राष्ट्रपति भ्लादिमिर पुटिनको अलास्कामा भएको भेटवार्ताको मात्र १३ दिनपछि भएको हो।
युक्रेनी राष्ट्रपति भोलोदिमिर जेलेन्स्कीले यसबारे प्रतिक्रिया दिंदै भनेका छन्, ‘रूसले शान्ति होइन, मिसाइल रोजेको छ।’
रूसी मिसाइलका छर्राबाट ब्रिटिश काउन्सिलको कार्यालय क्षतिग्रस्त भएको छ । रूसी आक्रमणमा ब्रिटिश सरकारको सम्पत्तिमा क्षति भएको यो पहिलोपटक हो ।
आक्रमणबाट युरोपेली संघ मिसनका भवनहरूमा समेत क्षति पुगेको छ। बेलायत र युरोपेली संघले रूसलाई कडा चेतावनी दिएका छन् भने ह्वाइट हाउसले भने वार्ता जारी रहने बताएको छ।
आक्रमणपछि कीभस्थित कार्यालयहरूमा क्षति पुगेको भन्दै बेलायत र युरोपेली संघले रूसी राजदूतहरूसँग स्पष्टीकरण सोधेका छन् ।