पहिरोले अवरुद्ध भएको पृथ्वी लोकमार्ग एकतर्फी सञ्चालन

सहयात्रा टिभी

काठमाडौं । भदौ १४, धादिङमा पहिरो गएर अवरुद्ध भएको पृथ्वी लोकमार्ग एकतर्फी रुपमा सञ्चालनमा आएको छ । धादिङको बेनिघाट रोराङ गाउँपालिका-१० बाँदरेमोडमा माथिबाट सुक्खा पहिरो गएपछि बिहानदेखि सडक अवरुद्ध भएको थियो ।

उक्त पहिरोको केही भाग हटाएर एकतर्फी सवारी सञ्चालनमा ल्याइएको जिल्ला प्रहरी कार्यालय धादिङले जनाएको छ । अस्थायी प्रहरी पोष्ट जवाङखोला, प्रहरी चौकी जोगिमा र इलाका प्रहरी कार्यालय गजुरीको टोली पहिरो खसेको ठाउँमा बिहानैदेखि खटिएको छ ।

अवरुद्ध सडक एकतर्फी खुलेपछि यातायातका साधन गन्तव्यतिर लागेका छन् । तर, बिहानैदेखि सडक अवरुद्ध भएकोले जाम लागेको छ । पहिरो ठूलो भएकोले सडक दुईतर्फी सञ्चालनमा ल्याउन अझै केही समय लाग्ने प्रहरीले जनाएको छ ।

प्रकाशित : 30 August, 2025

प्रतिक्रिया दिनुहोस्