दशैंका लागि भदौ २९ देखि सुकिला नोट साट्न पाइने
सहयात्रा टिभी
काठमाडौं । भदौ १५, नेपाल राष्ट्र बैंकले यस वर्षको दशैंलाई लक्षित गर्दै भदौ २९ गतेदेखि असोज १० गतेसम्म सुकिला नोट सटहीको व्यवस्था गरेको छ।
विगत वर्षहरूमा जस्तै यस वर्ष पनि नयाँ नोटको सट्टा सुकिला नोट मात्र सटही गरिने राष्ट्र बैंकले जानकारी दिएको छ।
बैंक तथा वित्तीय संस्थाहरूले गत वर्षदेखि नै नयाँ नोट सटही गर्न बन्द गरेका छन्।सर्वसाधारणले राष्ट्र बैंकको मुद्रा व्यवस्थापन विभाग, थापाथलीका साथै विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीस्थित प्रादेशिक कार्यालयहरूबाट सुकिला नोट सटही सुविधा लिन सक्नेछन्।
राष्ट्र बैंकका अतिरिक्त, विभिन्न बैंक तथा वित्तीय संस्थाका शाखा कार्यालयहरूबाट पनि सर्वसाधारण तथा वित्तीय संघसंस्थाहरूले नोट सटही सुविधा प्राप्त गर्न सक्ने व्यवस्था मिलाइएको राष्ट्र बैंकले जनाएको छ।
दशैंमा टीका लगाउँदा दक्षिणाका लागि नयाँ तथा सुकिला नोटको प्रयोग गर्ने चलन रहेकाले राष्ट्र बैंकले हरेक वर्ष यो सुविधा उपलब्ध गराउँदै आएको छ।