दूध उत्पादक किसान पनि आन्दोलनमा, डीडीसी कार्यालयमा धर्ना

सहयात्रा टिभी

काठमाडौं । भदौ १५, आफ्नो उत्पादनको उचित मूल्य र भुक्तानी नपाएको भन्दै देशका विभिन्न क्षेत्रका किसानहरू आन्दोलित भएका छन् । उखु किसानको आन्दोलन जारी रहँदै गर्दा दूध उत्पादक किसानहरू पनि बक्यौता रकम माग गर्दै सडकमा उत्रिएका छन् ।

लामो समयदेखि दूधको मूल्य भुक्तानी नपाएको भन्दै आक्रोशित किसानहरूले आज काठमाडौंको लैनचौरस्थित दुग्ध विकास संस्थान (डीडीसी) को केन्द्रीय कार्यालयमा धर्ना दिने भएका छन् । अखिल नेपाल किसान महासंघका अनुसार आज मध्याह्न १२ बजेदेखि करिब एक घण्टा धर्ना कार्यक्रम सञ्चालन हुनेछ ।

महासंघका प्रचार विभाग प्रमुख डा. भेषराज अधिकारीले संस्थान लगायतका निकायलाई पटक-पटक ध्यानाकर्षण गराउँदा पनि सुनुवाइ नभएपछि दबाब दिन धर्ना कार्यक्रम आयोजना गरिएको बताए । उनले भने, “गत वर्षदेखिको भुक्तानी नपाउँदा किसानहरू आर्थिक संकटमा परेका छन् । परिवार पाल्न, छोराछोरी पढाउन र पशुपालनलाई निरन्तरता दिन नै कठिन भएको छ ।” धर्नामा काभ्रे, नुवाकोट, धादिङ र काठमाडौं उपत्यका आसपासका किसानहरू सहभागी हुनेछन् ।

यसैबीच, सरकारले अनुदान रकम घटाएको विरोधमा काठमाडौंको माइतीघरमा प्रदर्शन गर्दै आएका उखु किसानहरूले आफ्नो आन्दोलनलाई थप सशक्त बनाउने घोषणा गरेका छन् । सरकारले प्रतिक्विन्टल ७० रुपैयाँको अनुदान घटाएर ३५ रुपैयाँमा झारेपछि उनीहरूले यही भदौ २५ गतेदेखि राजमार्ग अवरुद्ध गर्ने निर्णय गरेका छन् । उखु उत्पादक महासंघ र सम्बन्धित जिल्ला संघहरूको संयुक्त बैठकले राजमार्ग केन्द्रित आन्दोलनको निर्णय गरेको हो ।