सुन र चाँदीको मूल्यमा ऐतिहासिक कीर्तिमान, दुवैको भाउ हालसम्मकै उच्च
सहयात्रा टिभी
काठमाडौं । भदौ १५, नेपाली बजारमा आज सुन र चाँदीको मूल्यले ऐतिहासिक कीर्तिमान कायम गरेको छ । आइतबार एकैदिन छापावाल सुनको मूल्य प्रतितोला ३ हजार रुपैयाँ र चाँदीको मूल्य ६५ रुपैयाँले बढेर हालसम्मकै उच्च विन्दुमा पुगेको हो ।
नेपाल सुनचाँदी व्यवसायी महासंघका अनुसार आजका लागि छापावाल सुनको मूल्य प्रतितोला २ लाख ३ हजार ६ सय रुपैयाँ तोकिएको छ । शुक्रबार प्रतितोला २ लाख ६ सय रुपैयाँमा कारोबार भएको सुनको मूल्य आज एकैपटक ३ हजारले बढेको हो ।
यसैगरी, चाँदीको मूल्यले पनि नयाँ कीर्तिमान बनाएको छ । महासंघले आजका लागि चाँदीको मूल्य प्रतितोला २ हजार ४ सय २५ रुपैयाँ निर्धारण गरेको छ, जुन शुक्रबारको तुलनामा ६५ रुपैयाँले बढी हो । अघिल्लो कारोबार दिन चाँदी प्रतितोला २ हजार ३ सय ६० रुपैयाँमा कारोबार भएको थियो ।