भेनेजुएलाको तट नजिक एक तेल ट्यांकर अमेरिकी सेनाद्वारा नियन्त्रण
सहयात्रा टिभी
काठमाडौं । मंसिर २५ ,अमेरिकी सेनाले भेनेजुएलाको तट नजिक एक विशाल तेल ट्यांकर नियन्त्रणमा लिएको छ ।
यो कदमबाट अमेरिकाले भेनेजुएलाका राष्ट्रपति निकोलास मदुरोको सरकारमाथि दबाब झनै कडा बनाएको संकेत देखिएको बीबीसीले जनाएको छ ।
अमेरिकी राष्ट्रपति डोनाल्ड ट्रम्पले ह्वाइट हाउसमा पत्रकारसँग कुरा गर्दै भेनेजुएला तट नजिकै एउटा ठूलो तेल ट्यांकर कब्जा गरेको बताउनुभयो ।
बीबीसीले सार्वजनिक गरेको भिडियोमा सैनिकहरू हवाई मार्गबाट डोरी प्रयोग गर्दै ट्यांकरमा झर्दै गरेको देखिन्छ । यो ट्यांकर भेनेजुएला र इरानको प्रतिबन्धित तेल ढुवानीमा संलग्न भएको अमेरिकी दाबी छ ।
भेनेजुएलाले भने अमेरिकी कदमलाई अन्तर्राष्ट्रिय समुद्री डकैती भनेको छ । यसअघि नै राष्ट्रपति मदुरोले भेनेजुएलालाई तेल उपनिवेश बनाउन नदिने बताउनु भएको थियो ।
यस घटनाले विश्वबजारमा तेल आपूर्तिको डर बढेपछि तेलको मूल्य केही बिन्दुले बढेको विश्लेषकहरूले बताएका छन् । अमेरिकी कारबाहीमा २ हेलिकप्टर, १० कोस्ट गार्ड सदस्य, १० वटा आधुनिक डुङ्गा र विशेष फोर्सहरू सहभागी थिए ।
भेनेजुएलाको सरकारले विज्ञप्ति निकाल्दै यसलाई गम्भीर अन्तर्राष्ट्रिय अपराध भनेको छ । हालै अमेरिकाले झन्डै ९ हजार सैनिकलाई क्यारेबियन समुद्री क्षेत्र (भेनेजुएलाको उत्तरी सीमा) मा तैनाथ गरेको छ । विश्वकै सबैभन्दा ठूलो युद्धपोतसमेत भेनेजुएलाको नजिक परिचालित गरिएको छ, जसले सैन्य कारबाहीको आशंकालाई बढाएको छ ।