प्रतिनिधि सभा निर्वाचन : ३६ देखि ५० वर्ष उमेरका उम्मेदवार धेरै, महिला सहभागिता न्यून
सहयात्रा टिभी
काठमाडौं । माघ ७, आगामी प्रतिनिधि सभा निर्वाचनमा प्रत्यक्षतर्फका १६५ सिटका लागि ३ हजार ४८४ जनाले उम्मेदवारी दिएका छन् । निर्वाचन आयोगका अनुसार यस पटकको निर्वाचनमा विभिन्न ६८ वटा राजनीतिक दलहरूले आफ्ना उम्मेदवार चुनावी मैदानमा उतारेका छन् ।
निर्वाचन आयोगका प्रवक्ता नारायणप्रसाद भट्टराईले दिएको जानकारी अनुसार कुल उम्मेदवारमध्ये पुरुषको संख्या अत्यधिक छ । ३ हजार ४८४ उम्मेदवारमध्ये ३ हजार ८८ जना पुरुष रहेका छन् भने महिला उम्मेदवारको संख्या ३९५ मात्रै रहेको छ । यसले प्रत्यक्ष निर्वाचनमा महिलाको प्रतिनिधित्व अझै पनि न्यून रहेको देखाउँछ ।
उम्मेदवारहरूको उमेरगत विश्लेषण गर्दा ३६ देखि ५० वर्ष उमेर समूहका व्यक्तिहरूको आकर्षण बढी देखिएको छ । यस समूहमा कुल १ हजार ६१० जना उम्मेदवार छन्, जसमा २३५ महिला र १ हजार ३७५ पुरुष रहेका छन् ।
अन्य उमेर समूहको विवरण निम्नानुसार छ:
२५ देखि ३५ वर्ष: यो युवा समूहमा ५८३ जनाको उम्मेदवारी परेको छ । जसमा ६७ महिला र ५१५ पुरुष छन् ।
५१ देखि ६५ वर्ष: यो समूहमा १ हजार ९० जना उम्मेदवार रहेका छन् । जसमा ९० महिला र १ हजार पुरुष प्रतिस्पर्धी छन् ।
६५ वर्ष माथि: ज्येष्ठ नागरिकको समूहबाट २०१ जनाले उम्मेदवारी दिएका छन् । यस समूहमा महिलाको संख्या निकै कम अर्थात् ३ जना मात्र छ भने १९८ जना पुरुष उम्मेदवार छन् ।