गाजामा ८ हजार सैनिक पठाउने इन्डोनेसियाको तयारी

सहयात्रा टिभी

काठमाडौं । माघ  २८, गत वर्षको अन्त्यतिर अमेरिकाको मध्यस्थतामा भएको युद्धविराम सम्झौताको दोस्रो चरणको कार्यान्वयनका लागि इन्डोनेसियाले गाजामा ८,००० सम्म सैनिक परिचालन गर्ने तयारी गरेको छ। यस्तो कदम चाल्ने इन्डोनेसिया पहिलो मुलुक बनेको छ।

इन्डोनेसियाली सेनाका प्रमुख जनरल मारुली सिमन्जुन्तकका अनुसार सैनिकहरूको तालिम सुरु भइसकेको छ। गाजा पठाइने सैनिकहरूले मुख्यतया स्वास्थ्य (मेडिकल) र इन्जिनियरिङको भूमिका निर्वाह गर्नेछन्।

इन्डोनेसिया गत महिना घोषणा गरिएको अमेरिकी राष्ट्रपति डोनाल्ड ट्रम्पको ‘बोर्ड अफ पिस’ मा सहभागी भएको छ। संयुक्त राष्ट्रसङ्घीय सुरक्षा परिषद्बाट म्यान्डेट प्राप्त यस बोर्डले गाजामा ‘अन्तर्राष्ट्रिय स्थिरता बल’ (ISF) स्थापना गर्ने लक्ष्य राखेको छ। उक्त बलले गाजाको सीमा क्षेत्रको सुरक्षा गर्ने, सो क्षेत्रलाई सैन्यमुक्त (डिमिलिटराइज) बनाउने र हमासलाई निशस्त्रीकरण गर्ने कार्यमा सहयोग पुर्‍याउनेछ।

आगामी फेब्रुअरी १९ मा वासिङ्टनमा बस्ने बोर्डको पहिलो बैठकले गाजामा नयाँ प्राविधिक (टेक्नोक्रेटिक) प्यालेस्टिनी सरकार र युद्धपछिको पुनर्निर्माणको समेत रेखदेख गर्ने कार्यसूची रहेको छ।

इन्डोनेसियाली सैनिक कहिले र कुन भूमिकामा परिचालन हुने भन्ने अन्तिम टुङ्गो लाग्न बाँकी भए पनि राष्ट्रपति प्रबोवो सुब्यान्तोले सेना पठाउने निर्णय गरिसकेको बुझिएको छ। इजरायलले गाजामा गरेको बमबारीमा अमेरिकाको भूमिकालाई लिएर इन्डोनेसियामा सार्वजनिक आक्रोश बढिरहेका बेला राष्ट्रपति प्रबोवोको यो निर्णयलाई त्यहाँका केही मुस्लिम समूहहरूले आलोचना गरेका छन्।

तर, राष्ट्रपति प्रबोवोले विश्वकै ठूलो मुस्लिम राष्ट्रको हैसियतमा इन्डोनेसियाले गाजाको स्थिरताका लागि सहयोग गर्नुपर्ने तर्क गरेका छन्। उनले इन्डोनेसियाको यो संलग्नता इजरायल-प्यालेस्टाइन द्वन्द्वको अन्तिम समाधानका रूपमा मानिएको ‘दुई-राज्य समाधान’ (Two-state solution) प्राप्तिका लागि हुने बताएका छन्।

इजरायली सञ्चारमाध्यम ‘कान’ (Kan) का अनुसार दक्षिण गाजाको रफाह र खान युनिसको बीचको क्षेत्रमा इन्डोनेसियाली सेनाको ब्यारेक निर्माणका लागि ठाउँ समेत तय भइसकेको छ। टर्की र पाकिस्तान जस्ता अन्य मुस्लिम मुलुकहरूले पनि सेना पठाउने विषयमा विचार गरिरहेका छन्। तर, ती मुलुकहरूले आफूहरू केवल ‘शान्ति सैनिक’ का रूपमा मात्र जाने र हमासलाई निशस्त्रीकरण गर्ने योजनामा सहभागी नहुने स्पष्ट पारिसकेका छन्।

यद्यपि, इजरायलले गाजाका कतिपय क्षेत्रमा अझै कब्जा जमाइरहेको र हमासले हतियार त्याग्न अस्वीकार गरिरहेको वर्तमान अवस्थामा प्रस्तावित अन्तर्राष्ट्रिय बलका लागि त्यहाँ वास्तविक शान्तिको वातावरण भने अझै तयार भइसकेको देखिँदैन।