इराकमा अमेरिकी सैन्य विमान दुर्घटना : इरानमा ६ हजार स्थानमा अमेरिकी आक्रमण, एक फ्रान्सेली सैनिकको मृत्यु

सहयात्रा टिभी

काठमाडौं । फागुन  २९, मध्यपूर्वमा तनाव चरम उत्कर्षमा पुगेको छ। इराकमा एक अमेरिकी सैन्य विमान दुर्घटनाग्रस्त भएको छ भने अमेरिकाले इरानमा ‘अपरेशन एपिक फ्युरी’ अन्तर्गत ६,००० भन्दा बढी स्थानमा आक्रमण गरेको जनाएको छ। यसैबीच, इराकमा भएको ड्रोन आक्रमणमा एक फ्रान्सेली सैनिकको मृत्यु भएको छ।

पश्चिमी इराकको ‘मित्रवत् हवाई क्षेत्र’मा अमेरिकाको ‘केसी-१३५’ इन्धन भर्ने सैन्य विमान दुर्घटनामा परेको अमेरिकी सेनाले पुष्टि गरेको छ। यो घटना दुईवटा विमानहरू संलग्न रहेको एक ‘इन्सिडेन्ट’ पछि भएको हो, जसमा दोस्रो विमान भने सुरक्षित रूपमा अवतरण गरेको छ।

अमेरिकी सेन्ट्रल कमाण्डका अनुसार यो दुर्घटना कुनै ‘शत्रु वा मित्र राष्ट्रको आक्रमण’ बाट भएको होइन। हाल दुर्घटनास्थलमा उद्धार कार्य जारी छ। यद्यपि, विमानमा कति जना सवार थिए, हताहतीको अवस्था कस्तो छ र दुर्घटनाको मुख्य कारण के हो भन्ने अझै खुल्न सकेको छैन।

इरानमा ६ हजार लक्षित स्थानमा अमेरिकी आक्रमण
अमेरिकी सेन्ट्रल कमाण्डले जारी गरेको नयाँ तथ्याङ्क अनुसार अमेरिकाले ‘अपरेशन एपिक फ्युरी’ अन्तर्गत इरानका ६,००० लक्षित स्थानहरूमा आक्रमण गरेको छ।

यस कारबाहीमा करिब ६० वटा पानीजहाज र ३० वटा माइन बिछ्याउने जहाज (minelaying vessels) नष्ट वा क्षतिग्रस्त भएको अमेरिकाले जनाएको छ। यसबाहेक कमाण्ड सेन्टरहरू, हतियार उत्पादन केन्द्रहरू, ब्यालेस्टिक क्षेप्यास्त्र साइटहरू, पनडुब्बीहरू र हवाई सुरक्षा प्रणालीहरूलाई पनि निसाना बनाइएको छ।

यसैबीच, अमेरिका-इजरायल संयुक्त कारबाहीको सुरुवाती हवाई आक्रमणमा अमेरिकी सेनाले भुलवश इरानको एउटा विद्यालयमा आक्रमण गरेको हुन सक्ने अमेरिकी सैन्य अनुसन्धानकर्ताहरूले बताएका छन्, तर यसको अन्तिम निष्कर्ष भने आउन बाँकी छ।

इजरायलको आक्रमण निरन्तर
इजरायलले इरानको राजधानी तेहरानमा हवाई आक्रमणको नयाँ लहर सुरु गरेको जनाएको छ। यसका साथै इजरायलले आजै लेबनानमा रहेको हिजबुल्लाहलाई पनि निसाना बनाएको छ।

इरानका नयाँ सर्वोच्च नेता र खाडीमा आक्रमण
इरानका नयाँ सर्वोच्च नेता मोज्तबा खामेनीले सत्ता सम्हालेपछिको पहिलो वक्तव्य इरानी सरकारी टेलिभिजनमार्फत सार्वजनिक गरिएको छ। उक्त वक्तव्यमा उनले होर्मुज जलडमरू अवरुद्ध गर्ने कार्यलाई निरन्तरता दिने प्रतिबद्धता जनाएका छन्। तर, बीबीसी पर्सियनका अनुसार उनी घाइते भएको वा मारिएको हुन सक्ने अनुमान र अड्कलबाजी भइरहेका छन्।

यसैबीच, खाडी क्षेत्रमा कम्तीमा तीनवटा कार्गो पानीजहाजमाथि इरानले आक्रमण गरेको बताइएको छ। इरानी सरकारी सञ्चारमाध्यमले कम्तीमा एउटा आक्रमणमा इरानी सेनाको संलग्नता रहेको पुष्टि गरेको छ।

इराकमा ड्रोन आक्रमण : फ्रान्सेली सैनिकको मृत्यु
इरानको सिमानाबाट करिब ११५ किलोमिटर पश्चिममा पर्ने इराकको अर्ध-स्वायत्त कुर्दिस्तान क्षेत्र एर्बिलमा भएको ड्रोन आक्रमणमा ६ जना फ्रान्सेली सैनिक घाइते भएका छन् भने एक जनाको मृत्यु भएको छ। फ्रान्सेली राष्ट्रपति इम्यानुएल म्याक्रोंले ‘चिफ वारेन्ट अफिसर’ आर्नो फ्रिओनको मृत्यु भएको पुष्टि गर्दै यो इरानमा युद्ध सुरु भएयता फ्रान्सेली सेनाले भोगेको पहिलो मानवीय क्षति भएको बताएका छन्। घाइतेहरूलाई नजिकैको मेडिकल सेन्टरमा लगिएको रोयटर्सले जनाएको छ।

सामाजिक सञ्जालमा समवेदना प्रकट गर्दै राष्ट्रपति म्याक्रोंले स्लामिक स्टेट (आईएस) विरुद्धको लडाइँमा खटिएका सेनामाथिको आक्रमणलाई “अस्वीकार्य” भनेका छन्। उनले इराकमा फ्रान्सेली सेनाको उपस्थिति आतङ्कवादविरुद्धको लडाइँको हिस्सा भएको बताउँदै इरानको युद्धले यस्ता आक्रमणलाई सही ठहराउन नसक्ने स्पष्ट पारेका छन्।