इरानसँग वार्ता नभएको ट्रम्पको दाबी
सहयात्रा टिभी
काठमाडौँ । भदौ ३, अमेरिकी राष्ट्रपति डोनाल्ड ट्रम्पले इरानसँग हाल कुनै पनि किसिमको वार्ता नभइरहेको र भविष्यका लागि पनि कुनै वार्ता तय नभएको स्पष्ट पारेका छन्। हर्मुज जलमार्गमा अमेरिकी नौसैनिक नाकाबन्दी पूर्ण रूपमा लागू रहेको र त्यहाँ राखिएका समुद्री बारुदीसुरङ (माइन्स) हटाइसकिएको दाबी ट्रम्पले गरेका छन्।
अर्कोतर्फ, इरानी विदेशमन्त्री अब्बास अराघचीले भने अमेरिकाले इरानलाई आत्मसमर्पण गराउन असफल भएपछि अहिले इरानकै सर्तमा वार्ता गर्नका लागि ‘भिख मागिरहेको’ दाबी गरेका छन्।
यसैबीच, सिरियाले इजरायलसँग कुनै पनि किसिमको विशेष सुरक्षा सम्झौता भएको खबरको खण्डन गरेको छ। सिरियाली विदेश मन्त्रालयका एक कूटनीतिक स्रोतले अल जजिरालाई दिएको जानकारी अनुसार इजरायलले गरेका दाबी पूर्ण रूपमा असत्य हुन्।
उक्त क्षेत्रमा कुनै पनि विदेशी फौज नरहेको जानकारी गराउँदा-गराउँदै पनि इजरायलले ‘अबु अल-दुहुर’ सैन्य विमानस्थलमा आक्रमण गरेको सिरियाली स्रोतको भनाइ छ। सिरियाले आफ्ना नागरिक तथा सैन्य संयन्त्र निर्माणमा बाधा पुर्याउने वा क्षेत्रीय स्थिरतामा आफ्नो भूमिकालाई सीमित गर्ने कुनै पनि सम्झौता स्वीकार गर्न नसकिने स्पष्ट पारेको छ।
इद्लिबस्थित विमानस्थलमा इजरायलले गरेको आक्रमणको भर्त्सना गर्दै सिरियाले संयुक्त राष्ट्रसङ्घका महासचिव र सुरक्षा परिषद्का अध्यक्षलाई पत्र पठाउँदै सिरियाली भूभागबाट इजरायली फौज फिर्ता हुनुपर्ने माग गरेको छ। यता इजरायलले भने टर्कीले उक्त सैन्य अखडामा आफ्नो फौज परिचालन गर्ने योजना बनाइरहेको आशङ्कामा आक्रमण गरेको पुष्टि गरेको छ।