पृथ्वी, अरनिको र मेची राजमार्ग अवरुद्ध : देशभरका कुन सडकको अवस्था के छ ?

सहयात्रा टिभी

काठमाडौँ । भदौ १५ , अविरल वर्षा, बाढी र पहिरोका कारण देशका विभिन्न भागमा मुख्य राजमार्गहरू अवरुद्ध भएका छन्। प्रहरी प्रधान कार्यालयका अनुसार कोशी, बागमती र कर्णाली प्रदेशका विभिन्न सडक खण्डमा पहिरो खस्दा तथा बाढीको जोखिम बढेपछि यातायात ठप्प वा आंशिक रूपमा प्रभावित भएको हो।

कोशी प्रदेश: इलामको इलाम नगरपालिका-९ राजदुवालीस्थित मेची राजमार्ग भदौ २३ गतेदेखि नै पूर्ण रूपमा अवरुद्ध छ। ताप्लेजुङ-झापा जोड्ने उक्त सडक बन्द भएपछि हाल वैकल्पिक बाटोधरि सवारी सञ्चालन गरिएको छ।

बागमती प्रदेश: पृथ्वी राजमार्गअन्तर्गत धादिङको बेनिघाट रोराङ गाउँपालिका-७ कृष्णभिर र गजुरी गाउँपालिका-२ परेवाभिरमा भदौ १४ गते पहिरो खसेपछि सडक पूर्ण रूपमा अवरुद्ध बनेको छ। यस्तै, अरनिको राजमार्गअन्तर्गत सिन्धुपाल्चोकको भोटेकोशी गाउँपालिका-२ कोदारीमा पनि पहिरोका कारण यातायात ठप्प छ।

रसुवामा बाढीका कारण उत्तरगया गाउँपालिका-५ खाल्टेस्थित त्रिशुली मैलुङ स्याफ्रुबेसी सडक खण्ड र पासाङ ल्हामु सडक खण्डका मुख्य राजमार्गहरू पूर्ण रूपमा बन्द भएका छन्। सम्भावित जोखिमलाई ध्यानमा राख्दै केही राजमार्गमा रातको समयमा सवारी सञ्चालनमा रोक लगाइएको छ:

वि.पि. राजमार्ग: काभ्रेको खुर्कोट-नेपालथोक-कटुन्जेबेँसी खण्डमा साँझ ६ बजेदेखि बिहान ४ बजेसम्म सम्पूर्ण सवारी साधन सञ्चालनमा रोक लगाइएको छ। बिहान ४ देखि साँझ ६ बजेसम्म अवस्था हेरेर मात्र सञ्चालन गर्न दिइएको छ।

कान्ति लोकपथ: मकवानपुरको हेटौँडा-ठिङ्गन-बागमती-ललितपुर खण्डमा रातको ७ बजेदेखि बिहान ५ बजेसम्म यात्रामा रोक लगाइएको छ।

टोखा-छहरे सडक: नुवाकोटको शिवपुरी गाउँपालिका-८ घट्टेखोला खण्डमा राति १० बजेदेखि बिहान ५ बजेसम्म सवारी सञ्चालनमा प्रतिबन्ध लगाइएको छ।

कर्णाली प्रदेश: कर्णाली प्रदेशको मुगुस्थित छायाँनाथ रारा नगरपालिका-७ झ्यारीखोला र टोक्ला क्षेत्रमा पहिरो खस्दा नाग्म-मुगु गमगढी जोड्ने सडक खण्ड पूर्ण रूपमा बन्द भएको प्रहरीले जनाएको छ।