जलविद्युत प्रशारण लाइनको काम तीव्र
सहयात्रा टिभी
म्याग्दी । सरकारले म्याग्दीको अन्नपूर्ण गाउँपालिका–३ दानामा २२० केभिए सव–स्टेशन र म्याग्दीको दानादेखि पर्वतको खुर्कोट जोड्ने प्रशारण लाइन निर्माणको काम अघि बढाएपछि जलविद्युत आयोजनाको निर्माण कार्य तीव्ररुपमा अघि बढेको छ ।
कालीगण्डकी करिडोर क्षेत्रमा निर्माण हुने जलविद्युतलाई राष्ट्रिय प्रशारण लाइनमा जोडन सरकारले सवस्टेशन र प्रशारण लाइनको काम अघि बढाएको हो ।
दाना र खुर्कोटमा जग्गा प्राप्तिको विवादले निर्माण प्रक्रिया दुई वर्ष लम्बिएको थियो । सोही कारणले ४२ मेगावाट क्षमताको मिस्त्री खोला जलविद्युत् आयोजनाले १३ महिना लगाएर निर्माण कार्य गर्न सकेको थियो भने पाँच मेगावाट क्षमताको घलेम्दी जलविद्युत् आयोजनाको निर्माण पनि निकै सुस्त थियो ।
विसं २०७३ को जेठ महिनादेखि दानामा सवस्टेशन निर्माणको काम अघि बढेपछि र प्रशारण लाइनअन्तर्गत खुर्कोटमा निर्माण हुने सवस्टेशनको जग्गा विवाद पनि २०७३ भदौमा टुङ्गिएपछि अहिले सवस्टेशन र प्रशारण लाइन दुवै कामले गति लिएको छ । घलेम्दी हाइड्रो लिमिटेडका प्रबन्ध निर्देशक प्रमोद श्रेष्ठले दाना सवस्टेशनको विवाद ढिला टु्ङ्गिँदा यसको प्रभाव जलविद्युत् आयोजनामा परेको बताए ।
मिस्त्रीका आवासीय इन्जिनियर दिवाकर खड्काले पनि अबको २० महिनाभित्र आयोजना सम्पन्न गर्ने लक्ष्य राखिएको र सो अवधिभित्र सवस्टेशन र प्रशारण लाइन पनि सम्पन्न हुने आशा गरिएको बताए ।