पूर्वमन्त्री चौधरीसहित १२ जनालाई निलम्बन गर्न सिफारिस
सहयात्रा टिभी
पर्सा । स्थानीय तह निर्वाचनमा पार्टीका आधिकारिक उम्मेद्वारलाई हराउन लागेको भन्दै नेपाली कांग्रेस पर्सा क्षेत्र नं ४ ले पूर्वमन्त्री सुरेन्द्र चौधरीसहित १२ जनालाई कार्बाहीको सिफारिस गरेको छ ।
क्षेत्र नं ४ का क्षेत्रीय सभापति मृत्युञ्जयकुमार श्रीवास्तवले वीरगञ्जमा पत्रकार सम्मेलनको आयोजना गरी पार्टी पर्साका पूर्व जिल्ला सभापति समेत रहेका चौधरीसहित १२ जनालाई १५ वर्षका लागि पार्टीबाट निष्कासन गर्न सिफारिस गरेको जानकारी दिए । उनले असोज २ गते सम्पन्न भएको स्थानीय तह निर्वाचनमा नेपाली कांग्रेसको आधिकारिक उम्मेद्वारविरुद्ध बागी उम्मेद्वार खडा गरी पार्टीको उम्मेद्वारलाई हराउने कार्यमा संलग्न रहेका पूर्वमन्त्री समेत रहेका चौधरी र पूर्व जिल्ला सभापति जनार्दनसिंह क्षेत्रीसहित १२ जनालाई १५ वर्षसम्म पार्टीको साधारण सदस्यता समेतबाट निलम्वन गर्न क्षेत्रीय समितिको बैठकबाट सर्वसहमत निर्णय गरेर पार्टी केन्द्रीय कार्यालयलाई सिफारिस गरिएको बताए ।
क्षेत्रीय समितिको बैठकले पार्टीका उम्मेद्वारलाई हराउने कार्यमा संलग्न रहेका श्रीकृष्ण चौहान, ललन द्विवेदी, दिनेशकुमार चौधरी, शिव चौधरी, शैलेन्द्रप्रसाद यादव, ढेडीप्रसाद यादव, सिन्धु मेहता, रितनारायण चौधरी, रामजन पटवारी र वीरेन्द्र पाण्डेलाई कारबाही गर्न सर्वसहमत निर्णय गरेको क्षेत्रीय अध्यक्ष श्रीवास्तवले जानकारी दिए ।