निर्मला हत्या अनुसन्धान छानबिन समितिका सदस्य केसीद्धारा राजिनामा

सहयात्रा टिभी

काठमाडौं। भदौ २५, निर्मला पन्त हत्याको अनुसन्धानका लागि गठित उच्चस्तरीय छानबिन समितिका सदस्यमध्येका एक बीरेन्द्र बहादुर केसीले राजीनामा दिएका छन् । प्रदेश ७ का आन्तरिक मामिला तथा कानुन मन्त्रालयका उपसचिवसमेत रहेका केसीले सोमबार रिपोटर्स क्लबमा पत्रकार सम्मेलन गरि समितिको सदस्यबाट राजीनामा दिएको जानकारी दिएका हुन् । केसीले निर्मला हत्याको छानबिनबारे थप भएको म्यादमा असन्तुष्टि जनाउदै राजीनामा दिएका हुन्।

निर्मलाको न्यायका लागि नै मैले राजीनामा दिएको हुँ, म्याद थप गरिएकोमा मेरो असन्तुष्टि हो। अब म समितिमा बसेर काम गर्न सक्दिन केसीले भने ।

आफूले तोकिएको १५ दिनको समयावधिभित्रै प्रतिवेदन पेश गर्ने उद्देश्यले प्रतिवेदनको मस्यौदा तयार पारेको र डिएनए टेष्टको कम्प्लिकेशन, र १५ दिनभित्र प्रतिवेदन पेश नगरेमा हुनसक्ने सम्भावित दुर्घट्ना र अपराधी उम्कन सक्ने सम्भावनाबारे समितिसमक्ष बारम्बार आफ्ना धारणा राख्दै आएको थिए । मेरा धारणा र तथ्य अव ओझेलमा पर्न सक्ने देखेर राजीनामा दिएको केसीले बताए ।

उनले जारी गरेको विज्ञप्तीमा भनिएको छ, ‘घट्नाको छानबिनको क्रममा सत्य, तथ्य प्राप्त गर्ने र मुख्य अपराधी पत्ता लगाउन लागीपर्ने अठोटसँगै आफू क्रियाशील रहँदा मेरो ज्यान जोखिममा रहेको र शक्तिशाली अपराधीबाट मलाई जुनसुकै समयमा पनि हत्या गर्न सक्ने प्रवल सम्भावना रहेकाले, नेपाल सरकार, राष्ट्रिय मानवअधिकार आयोग, युनाईडेट नेशन ह्युम्यान राईट्स अफिस अफ द हाई कमिशन, मानव अधिकार सम्र्वद्धन तथा प्रर्वद्धन गर्ने राष्ट्रिय तथा अन्तर्राष्ट्रिय मानव अधिकारवादी संस्था, सञ्चार जगत नागरिक समाज र राजनीतिक दल लगायतलाई मेरो जीवन रक्षाको लागि सहयोग गरिदिन हार्दिक आग्रह गर्दछु’ केसीले जारी गरेको विज्ञप्तीमा उल्लेख छ । यस हिसावले अव निर्मला पन्तको हत्यमा संलग्न हत्याराले सजिलै उम्किने होकि भन्ने प्रश्न उव्जिएको छ ।