हड्डी र दिमागका लागि निकै फाइदाजनक छ आँप

सहयात्रा टिभी

काठमाडौं । जेठ २६, आँपलाई फलको राजा भनिन्छ । शास्त्रमा यसलाई अमृत फल भनिएको छ । आँप काँचो होस् वा पाकेको दुवैमा औषधीय गुण हुन्छ ।

पाकेको आँपमा प्रोटिन, बोसो, खनिज पदार्थ, कार्बोहाइड्रेट, क्याल्सियम, फोस्फोरस, फलाम, भिटामिन ‘ए’, ‘सी’ र ‘बी’ लगायत पाइन्छ । आँपको मुख्य घटक सर्करा हो, जुन विभिन्न फलमा ११ देखि २० प्रतिशतसम्म हुन्छ । आँपमा पाइने मुख्यतः चिनी त्यसको खानयोग्य खण्डको ६.७८ देखि १६.९९ प्रतिशतसम्म हुन्छ । ग्लुकोज र अन्य सर्करा भने १.५३ देखि ६.१४ प्रतिशतसम्म पाइन्छ ।आँपमा टार्टरिक र मेलिक अम्लसमेत पाइन्छ । साइट्रिक अम्ल भने थोरै मात्रामा हुन्छ । यो अम्ललाई मानव शरीरले उपयोग गर्ने गर्छ । यो अम्ल शरीरमा क्षारीय सञ्चय कायम राख्न सहयोगी हुन्छ ।

आँपले “ह्यापी हर्मोन” उत्पादन गर्ने चिकित्सकहरु बताउँछन् । बच्चाहरु पनि आँप निकै मन पराउँछन् । ८ महिनाभन्दा बढीका बालबच्चालाई आँप खुवाउन सकिन्छ । आँपले बच्चाहरुको मानसिक विकास गर्नुका साथै पाचन तन्त्र पनि ठिक गराउँछ भने यसले रोग प्रतिरोधात्मक क्षमता पनि बढाउँछ ।

दिमाग र हड्डीको विकास
आँपको सेवनले बच्चाको दिमाग र हड्डिहरुको विकास गर्छ । आँपमा थुप्रै प्रकारका पोषक तत्वहरु पाइन्छ । क्याल्शियम, बेटा क्यारोटिन, भिटामिन ए जस्ता तत्वहरुले बच्चाको हड्डीको छिटो वृद्धि विकास गराउँछ भने स्मरण शक्तिमा पनि वृद्धि गर्छ ।

तुरुन्त शक्ति प्राप्त गर्न
बच्चाहरु धेरै चल्ने भएकाले उनीहरुमा शक्ति छिट्टो कम हुन्छ । त्यसैले तुरुन्त शक्ति प्राप्त गर्न आँपको सेवन गर्न सकिन्छ । भिटामिन सी र मिनरल्स जस्ता पदार्थहरु हुने भएकाले आँपले मांसपेशी र हड्डीको विकासका लागि रोकावट हुन दिँदैन । भिटामिन बी ६ र बी २ जस्ता तत्वका कारण बच्चाहरुलाई तुरुन्त शक्ति ल्याउनका लागि आँप खुवाउन सकिन्छ ।

आँखा र मुटु
मुटु र आँखाका लागि निकै फाइदाजनक मानिन्छ । भिटामिन ए हुने भएकाले आँखाको ज्योती पनि बढाउँछ । आँपमा हुने बायोकेमिकल्सले आँखा बिग्रिनबाट पनि बचाउँछ । पोटाशियम र म्याग्नेशियम पनि हुने भएकाले रक्तचाप पनि सन्तुलनमा ल्याउँछ ।

रोग प्रतिरोधात्मक क्षमता
आँपमा भरपूर मात्रामा भिटामिन सी हुने भएकाले रोग प्रतिरोधात्मक क्षमता मजबुत गराउँछ । बाहिरी इन्फेक्सनबाट पनि बचाउँछ । भिटामिन ई र भिटामिन बी ६ हुने भएकाले आँपले रोग प्रतिरोधात्मक क्षमता बढाउँछ ।

पाचन तन्त्र मजबुत
आँपमा प्राकृतिक कार्बोहाइड्रेट्स हुन्छ । जसले पाचन प्रक्रियालाई सक्रिय बनाउँछ । फाइबर र पोटासियम हुने भएकाले बच्चालाई फाइदा पनि गर्छ । डाइजेस्टिव एंजाइम्स हुने भएकाले पाचनसम्बन्धी समस्या टाढा बनाउँछ ।