हाइटीमा ७.२ म्याग्नेच्युटको शक्तिशाली भूकम्प, तीन सय चारको मृत्यु
सहयात्रा टिभी
काठमाडौँ । साउन ३१, क्यारेबियन राष्ट्र हाइटीमा आएको शक्तिशाली भूकम्पमा परी कम्तिमा तीन सय चार जनाको मृत्यु भएको छ ।
शनिबार आएको सात दशमलब दुई म्याग्नेच्युटको भूकम्पमा एक हजार आठ सय जना घाइते भएका छन् ।
हाइटीको सेन्ट लुइस दु सुद शहरबाट करिब १२ किलोमिटर टाढा केन्द्रविन्दु बनाएर भूकम्प आएको अमेरिकी भूगर्भीय सर्वेक्षणले जनाएको छ ।
भुकम्पले भवन, होटल तथा चर्चहरुमा क्षति पुगेको छ । भुकम्पको धक्का राजधानी पोर्ट औ प्रिन्समा पनि महसुस गरिएको थियो ।
हाइटीका प्रधानमन्त्री एरियल हेनरीले उद्धार कार्यका लागि अधिकारकर्मीहरु पठाइसकेको जानकारी दिनु भएको छ ।
उहाँले भग्नावशेषमा कतिपय मानिस फसेका हुन सक्ने भन्दै चाँडो उद्धार कार्यलाई प्रभावकारी बनाउन निर्देशन दिनु भएको छ । हाइटीमा सन् २०१० पछिको यो शक्तिशाली भुकम्प हो ।