विराट गोल्डकप : आयोजक सेमिफाइनलमा
सहयात्रा टिभी
विराटनगर । चैत १०, नेपाल पुलिस क्लबलाई पराजित गर्दै घरेलु टिम विराटनगर सिटीले सातौं संस्करणको विराट गोल्डकप फुटबल प्रतियोगितामा विजयी सुरुआत गरेको छ ।
शहीद रंगशालामा बिहीबार राति भएको उद्घाटन खेलमा पूर्व विजेता टिम नेपाल पुलिस क्लबलाई १–० गोलले निराश बनाउँदै घरेलु टोली विराटनगर सेमिफाइनलमा प्रवेश गरेको हो ।
विराटनगरको जितमा आशिष श्रेष्ठले निर्णायक गोल गरे । निर्धारित समयसम्म गोलरहित बराबरी भएपछि थप गरिएको अतिरिक्त समयमा विराटनगरका आशिषले निर्णायक गोल गरेका थिए ।
दिवाकर चौधरीले निकालिदिएको पासलाई आशिषले गोलमा परिणत गरे । उनी सागर थापाको ठाउँमा मैदान प्रवेश गरेका थिए ।
पहिलो हाफसम्म पुलिसले विराटनगरलाई दबावमा राखेको थियो । प्रहरीले केही उत्कृष्ट अवसर सिर्जना गरे पनि गोल गर्न भने सकेन । आज नेपाल आर्मी र जावलाखेल युथ क्लबबीच हुनेछ ।